కెసిఆర్ ని అడ్డుకున్న రైతులు

మహబూబ్ నగర్: తన సొంత నియోజకవర్గం మహబూబ్ నగర్ లో పర్యటిస్తున్న తెలంగాణ రాష్ట్ర సమితి పార్లమెంటు సభ్యుడు కె.చంద్రశేఖర రావు కాన్వాయ్ ని రైతులు మంగళవారం అడ్డుకున్నారు. మహబూబ్ నగర్ జిల్లా రాచాలలో వారు కెసిఆర్ కాన్వాయ్ ని అడ్డుకుని తమ ఎండిన పంటలను చూడాలని కోరారు. దీనికి ఆయన అంగీకరించారు. రైతులతో కలసి ఆయన ఎండిన పంటలను చూసి రైతుల కష్టాలను అడిగి తెలుసుకున్నారు.

ఇదిలా ఉంటే, బిజెపితో చేతులు కలిపిన చంద్రశేఖరరావుకు జహంగీర్ పీర్ దర్గాను సందర్శించే హక్కు లేదని తెలంగాణ రాష్ట్ర సమితి (తెరాస) అసమ్మతి నేత రెహ్మాన్ అన్నారు. ముస్లిం మైనారిటీలను నమ్మించడానికి, వారిని తిరిగి ఆకట్టుకోవడానికి కెసిఆర్ జహంగీర్ పీర్ దర్గాను సందర్శించారని ఆయన మంగళవారం మీడియా ప్రతినిధుల సమావేశంలో అన్నారు.