మాపై రెండు పత్రికల కుట్ర: చిరు

హైదరాబాద్: తమ పార్టీ కాంగ్రెసులో విలీనం అవుతున్నట్లు మీడియాలో వచ్చిన వార్తలపై ప్రజారాజ్యం పార్టీ అధ్యక్షుడు చిరంజీవి ఆశ్చర్యం వ్యక్తం చేశారు. ఆ వార్తా కథనాలు వచ్చిన నేపథ్యంలో ఆయన గురువారం ఉదయం శాసనసభ ఆవరణలో తమ పార్టీ శాసనసభ్యులతో సమావేశమయ్యారు. ఈనాడు, ఆంధ్రజ్యోతి దినపత్రికలు తమపై అభూత కల్పనలు రాస్తున్నాయని అనంతరం ఆయన మీడియా ప్రతినిధులతో అన్నారు. పార్టీని బలహీనపరిచేందుకు ఆ రెండు పత్రికలు కుట్ర చేస్తున్నాయని ఆయన విమర్సించారు.తమ జెండా ఎవరు పీకుతారో చూస్తానని ఆయన అన్నారు.

గత నాలుగు రోజులుగా పత్రికల్లో వార్తలు వస్తున్న నేపథ్యంలో తాము గత రాత్రి సమావేశమయ్యామని ప్రజారాజ్యం పార్టీ శాసనసభ్యురాలు వంగా గీతా అంగీకరించారు. భవిష్యత్తులో పార్టీ బలోపేతం అవుతుందని ఆమె ఆశాభావం వ్యక్తం చేశారు. తమ పార్టీ కాంగ్రెసులో విలీనం అవుతున్నట్లు వస్తున్న వార్తలు వాస్తవం కాదని ప్రజారాజ్యం పార్టీ మరో శాసనసభ్యురాలు శోభా నాగిరెడ్డి అన్నారు.