బాబు వల్లే సమస్య: వైయస్

న్యూఢిల్లీ: తెలుగుదేశం పార్టీ అధ్యక్షుడు నారా చంద్రబాబు నాయుడి వల్లనే సమస్య వస్తోందని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. కరువును, ధరలను రాజకీయం చేసేందుకు ప్రతిపక్షాలు ప్రయత్నిస్తున్నాయని ఆయన అన్నారు. కరవుపై చర్చించేందుకు జరిగిన సిడబ్ల్యుసి సమావేశంలో పాల్గొన్న అనంతరం బుధవారం సాయంత్రం ఆయన మీడియా ప్రతినిధులతో మాట్లాడారు. తమది అధికార పక్షం కాబట్టి బాధ్యతలు ఎక్కువగా ఉంటాయని ఆయన అన్నారు.

సిడబ్ల్యుసిలో పార్టీపరంగా కరవు ఎలాంటి చర్యలు తీసుకోవాలనే అంశంపై చర్చ జరిగినట్లు ఆయన తెలిపారు. దేశంలోని కరవు పరిస్థితిని సమీక్షించి, ఎలాంటి చర్యలు తీసుకోవాలనే అంశంపై చర్చించామని ఆయన అన్నారు. వ్యాపారులు సరుకులను నిల్వ చేస్తే కాంగ్రెసు కార్యకర్తలు ఎలాంటి పాత్ర పోషించాలనే అంశంపై చర్చించినట్లు ఆయన తెలిపారు. కరవు ప్రాంతాలను ప్రకటించే విషయంలో జాప్యం ఎందుకనే ప్రశ్నకు ఆయన సమాధానం ఇవ్వలేదు.