చిరు పార్టీ వార్తలపై ఈనాడు వివరణ

హైదరాబాద్: తమపై ప్రజారాజ్యం పార్టీ అధినేత చిరంజీవి తీవ్ర వ్యాఖ్యలు చేసిన నేపథ్యంలో తాము జెండా పీకేద్దామంటూ రాసిన వార్తా కథనంపై ఈనాడు సంపాదక వర్గం వివరణ ఇచ్చింది. ప్రజారాజ్యంపై మాకు వ్యతిరేక భావం లేదు అనే శీర్షిక కింద ఈనాడు సంపాదక వర్గం తన వివరణను శుక్రవారంనాటి సంచికలో ప్రచురించింది. రాజకీయ పార్టీల్లో అంతర్గతంగా చోటుచేసుకునే ఆసక్తికర పరిణామాల్ని పాఠకులకు అందించడం పత్రికల విధి అని, అందులో భాగంగానే తమకున్న సమాచారం మేరకు బుధవారం రాత్రి ప్రరాపా అగ్రనేత అల్లు అరవింద్ ఇంట్లో జరిగిన సమావేశ విశేషాలను ఈనాడు కథనంగా ఇచ్చిందని స్పష్టం చేసింది.

సమాచారాన్ని విశ్వసనీయమైనదిగా భావించి భేటీలో పాలు పంచుకున్న ముఖ్యులతో మాట్లాడిన మీదటనే ఈ కథనాన్ని ప్రచురించామని, ఇందులో తమకు ఎటువంటి ఇతర ఉద్దేశాలుగ గానీ రాగద్వేషాలు గానీ లేవని, ప్రజారాజ్యం పార్టీపై ఈనాడుకు వీసమెత్తైనా వ్యతిరేక భావం లేదని వివరించింది. 2008 ఆగస్టు 26న ప్రజారాజ్యం పార్టీని తిరుపతిలో ప్రారంభించిన నాటి నుంచి ఇప్పటి వరకు ప్రచురితమైన కథనాల్లో పాఠకాసక్తి మినహా మరో ఉద్దేశం లేనేలేదని ఈనాడు సంపాదకవర్గం వివరించింది.