అనుమానాలు వద్దు: పొన్నాల

హైదరాబాద్: జలయజ్ఞంపై అనుమానాలు వద్దని భారీ నీటి పారుదల శాఖ మంత్రి పొన్నాల లక్ష్మయ్య చెప్పారు. ప్రతిపక్షాల ప్రశ్నలకు శుక్రవారం శాససనభలో సమాధానమిస్తూ ఆయన ఆ విషయం చెప్పారు. అన్ని సాగునీటి ప్రాజెక్టులను ప్రభుత్వం చిత్తశుద్ధితో పూర్తి చేస్తామని ఆయన చెప్పారు. ఎగువ ప్రాంతాలకు, మెట్ట ప్రాంతాలకు, నీటి ముఖమే చూడని ప్రాంతాలకు ఎత్తిపోతల ద్వారా సాగునీరు అందిస్తామని ఆయన అన్నారు. రాష్ట్రంలోని 65 శాతం మందికి ఉపాధి లభించేలా చర్యలు తీసుకుంటామని ఆయన చెప్పారు. రైతులకు ఉరితాళ్లు కాకుండా రైతుల మేలు కోసం తాము పనిచేస్తున్నామని ఆయన అన్నారు.

పూర్తి చేయడానికి వీలు కాని సాగునీటి ప్రాజెక్టులను విరమించుకోవాలని అంతకు ముందు లోకసత్తా సభ్యుడు జయప్రకాష్ నారాయణ ప్రభుత్వానికి సూచించారు. ఈ విషయంలో ప్రభుత్వం ప్రతిష్టకు పోవద్దని ఆయన సూచించారు. మనం చేపట్టే కార్యక్రమాలు రైతులకు ఉరితాళ్లు కాకూడదని ఆయన అన్నారు. హేతుబద్దంగా ఆలోచించి పూర్తి చేయడానికి వీలు కాని ప్రాజెక్టులను విరమించుకోవడానికి రాజకీయ పార్టీలన్నీ సహకరిస్తాయని ఆయన చెప్పారు. 7 వేల మెగావాట్ల విద్యుదుత్పాదనకే ప్రాజెక్టులు చేపట్టడం సరి కాదని ఆయన అన్నారు.