ఇద్దరిపై వేటుకు టిడిపి ఫిర్యాదు

హైదరాబాద్: తెలుగుదేశం పార్టీ శాసనసభ్యులు ఎర్రబెల్లి దయాకరరావు, మండవ వెంకటేశ్వర రావు మంగళవారం స్పీకర్ కిరణ్ కుమార్ రెడ్డిని కలిశారు. తమ పార్టీ అసమ్మతి శాసనసభ్యులు నల్లపురెడ్డి ప్రసన్న కుమార్ రెడ్డి, బాలనాగిరెడ్డిలపై అనర్హత వేటు వేయాలని కోరుతూ వారు స్పీకర్ కు వినతిపత్రం సమర్పించారు.

తెలుగుదేశం పార్టీ తరఫున శాసనసభకు ఎన్నికైన ప్రసన్న కుమార్ రెడ్డి, బాలనాగిరెడ్డి పార్టీ అధ్యక్షుడు నారా చంద్రబాబునాయుడిపై గత కొద్ది కాలంగా తీవ్ర విమర్శలు చేస్తున్నారు. చంద్రబాబుకు నల్లపురెడ్డి ప్రసన్నకుమార్ రెడ్డి లేఖాస్త్రాలు సంధించారు. తెలుగుదేశం పార్టీ అధ్యక్ష పదవి నుంచి తప్పుకోవాలని ఆయన చంద్రబాబును డిమాండ్ చేశారు. ఈ నేపథ్యంలో తెలుగుదేశం శాసనసభ్యులు స్పీకర్ కు ఆ విజ్ఞప్తి చేశారు.