వైయస్ షాక్ తో 30 మంది మృతి

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి ఆకస్మిక మృతితో షాక్ కు గురై రాష్ట్రంలో గురువారం దాదాపు 30 మంది అభిమానులు మరణించారు. అయితే ఈ సంఖ్య 70 దాకా చేరిందనే వార్తలు కూడా అందుతున్నాయి. అయితే 30 మరణాలు మాత్రం కచ్చితంగా తెలుస్తున్నాయి. తూర్పు గోదావరి జిల్లాలో 9 మంది మరణించారు. వైయస్ మృతి వార్తను తట్టుకోలేక మాజీ మంత్రి జక్కంపూడి రామమోహన్ రావు స్పృహ తప్పి పడిపోయారు. వీరిలో ఏడుగురు షాక్ వల్ల, గుండెపోటు వల్ల మరణించగా, ఇద్దరు ఉరి వేసుకుని చనిపోయారు. నరేంద్రపురం గ్రామానికి చెందిన 20 ఏళ్ల ఏసుబాబు, నాగారం గ్రామానికి చెంది 48 ఏళ్ల ఆచంట రామకృష్ణ ఆత్మహత్యలు చేసుకున్నారు.

చిత్తూరు జిల్లాలోని వనమల్ల గ్రామంలో రాజీవ్ ఆరోగ్యశ్రీ ద్వారా లబ్ధి పొందిన దినసరి కూలీ 44 ఏళ్ల బి.పద్మ వైయస్ మృతిని తట్టుకోలేక షాక్ కు గురై మరణించింది. అదే జిల్లాలో పార్వతమ్మ అనే 22 ఏళ్ల యువతి మరణించింది. వైయస్ వీరాభిమాని టీవీ షాప్ యజమాని ఎన్ రాజారెడ్డి గుండెపోటుతో మరణించాడు.