రాష్ట్రంలో వైయస్ జగన్ మానియా

హైదరాబాద్: దివంగత వైయస్ రాజశేఖర రెడ్డి తనయుడు, పార్లమెంటు సభ్యుడు వైయస్ జగన్మోహన్ రెడ్డిని ముఖ్యమంత్రిని చేయాలని కోరుతూ రాష్ట్రంలో ఆందోళనలు మొదలయ్యాయి. నిరాహార దీక్షలు, దిష్టిబొమ్మల దగ్ధం, సంతకాల సేకరణ వంటి కార్యక్రమాలు శనివారం ప్రారంభమై ఆదివారం కూడా కొనసాగుతున్నాయి. ఆదివారం ఉదయం వైయస్ జగన్ ఇడుపులపాయ ఎస్టేట్ నుంచి తన కుటుంబ సభ్యులతో కలిసి హైదరాబాద్ వచ్చారు. వైయస్ రాజశేఖర రెడ్డిని ఇడుపులపాయ ఎస్టేట్ లో సమాధి చేశారు. జగన్ ను ముఖ్యమంత్రిని చేయాలని ఒత్తిడి పెరుగుతున్న కొద్దీ సీనియర్ కాంగ్రెసు నేతలు తమ అంతరంగాలను విప్పుతున్నారు. వి. హనుమంతరావు, కె కేశవరావు వంటి నాయకులు కూడా ముఖ్యమంత్రి పదవిపై ఆశలు పెట్టుకున్నట్లు ఆ ప్రకటనలను బట్టి అర్థమవుతోంది.

వైయస్ సంతాపదినాలు ముగిసేంత వరకు కొత్త ముఖ్యమంత్రి ఎంపికపై ఆలోచన చేయబోమని కాంగ్రెసు అధిష్ఠానవర్గం స్పష్టం చేసింది. ఏడు రోజుల పాటు సిఎల్పీ సమావేశం జరగదనే విషయం దాని ద్వారా వెల్లడైంది. జగన్ ను ముఖ్యమంత్రిని చేయాలనే ఆందోళనలకు సంబంధించిన ఉద్వేగాలు తగ్గే వరకు నిరీక్షించాలనేది పార్టీ అధిష్ఠాన వర్గం ఆలోచనగా తెలుస్తోంది. జగన్ ను ముఖ్యమంత్రిని చేయకపోతే రాజీనామా చేస్తామని కొందరు యువ శాసనసభ్యులు హెచ్చరికలు బహిరంగంగానే చేశారు. మెదక్ జిల్లాలో కొంతమంది సెల్ టవర్ ఎక్కి ఆందోళన చేశారు. శాసనసభ్యులు సిహెచ్ లింగయ్య, టి. రాజయ్య నిరాహార దీక్షకు దిగారు. వరంగల్, మెదక్, గుంటూరు, తదితర ప్రాంతాల్లో ఆందోళనలు జరుగుతున్నాయి.