మేడమ్ నిర్ణయిస్తారు: కెవిపి

హైదరాబాద్: కొత్త ముఖ్యమంత్రిపై కాంగ్రెసు పార్టీ అధ్యక్షురాలు సోనియా గాంధీ నిర్ణయం తీసుకుంటారని దివంగత నేత వైయస్ రాజశేఖర రెడ్డి ఆత్మీయ మిత్రుడు, రాజ్యసభ సభ్యుడు కెవిపి రామచందర్ రావు అన్నారు. సోనియా గాంధీని కలిసిన అనంతరం ఆయన మంగళవారం సాయంత్రం మీడియా ప్రతినిధులతో మాట్లాడారు. మేడమ్ ముఖ్యమంత్రి సతీమణి, ఇతర కుటుంబ సభ్యుల ఆరోగ్యం గురించి అడిగారని, వారు దిగ్భ్రాంతి నుంచి కోలుకుని సాధారణ జీవితంలోకి వచ్చారా అని ప్రశ్నించారని ఆయన తెలిపారు. ప్రస్తుత రాజకీయ పరిస్థితులపై అడిగి తెలుసుకున్నారని ఆయన చెప్పారు.తాను తన వద్ద ఉన్న సమాచారాన్ని అందజేసినట్లు ఆయన తెలిపారు.

సోనియా గాంధీని కలవడానికి ముందు ఆయన మేడమ్ ఏ నిర్ణయం తీసుకున్నా తమకు శిరోధార్యమని ఆయన అన్నారు. రోశయ్యనే మరి కొంత కాలం ముఖ్యమంత్రిగా కొనసాగించే అవకాశం ఉందని వస్తున్న వార్తలపై ప్రశ్నించగా ఆయన రెండు చేతులూ జోడించి మేడమ్ ఏ నిర్ణయం తీసుకున్నా తమకు అభ్యంతరం లేదని అన్నారు. పిసిసి సంతాప సభలో జరిగిన గొడవపై ఆయన సోనియా గాంధీకి వివరణ ఇచ్చినట్లు తెలుస్తోంది. కెవిపి సోనియా గాంధీని కలిసినప్పుడు ఆమె రాజకీయ సలహాదారు అహ్మద్ పటేల్ కూడా ఉన్నారు. మరి కొంత కాలం ఢిల్లీలోనే ఉండాలని పార్టీ అధిష్ఠాన వర్గం కెవిపికి సూచించినట్లు సమాచారం. ఆయన మరోసారి సోనియా గాంధీని కలిసే అవకాశం ఉంది.