సిఎం పోస్టుపై శనివారం భేటీ

న్యూఢిల్లీ: ఆంధ్రప్రదేశ్ ముఖ్యమంత్రి పదవిపై కాంగ్రెసు పార్టీ అధిష్ఠాన వర్గం శనివారం సమావేశమై చర్చించనుంది. అయితే ఆ రోజు నేతను ఎంపిక చేస్తారని గ్యారంటీ ఏమీ లేదు. ముఖ్యమంత్రి పదవిపై తాము ఇంకా ఏ నిర్ణయమూ తీసుకోలేదని పార్టీ అధిష్ఠానవర్గం తెలియజేసింది. తాము అన్ని వైపుల నుంచి సమాచారం సేకరిస్తున్నట్లు తెలిపింది. శనివారం జరిగే సమావేశంలో ముఖ్యమంత్రి పదవికి ఎవరిని ఎంపిక చేయాలనే విషయంపై సీరియస్ గానే చర్చ జరిగే అవకాశం ఉంది. అధిష్ఠాన వర్గం ముందు మూడు విషయాలను పరిగణనలోకి తీసుకుని చర్చ జరిపే అవకాశం ఉంది. జగన్ ను ముఖ్యమంత్రిని చేయడం, జగన్ కు కేంద్రంలో పదవి ఇచ్చి మరో నేతను ముఖ్యమంత్రిని చేయడం, మరి కొంత కాలం రోశయ్యనే ముఖ్యమంత్రి చేయడం అనే అంశాలపై కాంగ్రెసు అధిష్ఠాన వర్గం దృష్టి పెడుతోంది.

కోర్ కమిటీ అభిప్రాయాన్నే కాకుండా మరి కొంత మంది అగ్ర నేతల అభిప్రాయం కూడా తీసుకుని ఆంధ్రప్రదేశ్ ముఖ్యమంత్రిని ఎంపిక చేయాలనేది సోనియా గాంధీ అభిమతంగా తెలుస్తోంది. కేంద్రంలో కాంగ్రెసు అధికారానికి రావడంలో ఆంధ్రప్రదేశ్ కీలక పాత్ర పోషిస్తున్న నేపథ్యంలో ముఖ్యమంత్రిని ఎంపిక చేయడంలో పార్టీ అధిష్ఠాన వర్గం అన్ని రకాల జాగ్రత్తలు తీసుకునే అవకాశం ఉంది. వైయస్ జగన్ అనుభవంపైనే కాకుండా వైయస్ రాజశేఖర రెడ్డి అంత్యక్రియలు జరగకుండానే ఆయన లాబీ వైయస్ జగన్ కోసం పట్టుబట్టడంపై కూడా అధిష్ఠానవర్గం అనుమానాలు వ్యక్తం చేస్తోంది. అయితే, ఇప్పటికే జగన్ కు అనుకూల, ప్రతికూల వర్గాలు ఢిల్లీలో మోహరించాయి. జగన్ కు మెజారిటీ శాసనసభ్యుల మద్దతు ఉన్నప్పటికీ వ్యతిరేకులు పెద్దగా బయట పడకపోయినప్పటికీ పరిస్థితి ఎలా ఉంటుందనే విషయంపై కూడా అధిష్ఠాన వర్గం ఆలోచిస్తోంది. బొటాబోటీ మెజారిటీతోనే కాంగ్రెస్ అధికారంలోకి రావడంతో జగన్ ను ముఖ్యమంత్రిని చేస్తే జరిగే తిరుగుబాట్లపై కూడా దృష్టి పెట్టింది.