అనూషను ఆదుకుంటాం: సబిత

హైదరాబాద్: ప్రేమోన్మాది ఘటనలో గాయపడి, తల్లిదండ్రులను కోల్పోయిన అనూషను అన్ని విధాలా ఆదుకుంటామని రాష్ట్ర హోం మంత్రి సబితా ఇంద్రారెడ్డి చెప్పారు. అనూష, ఆమె ఇద్దరు చెల్లెళ్ల చదువు బాధ్యతను ప్రభుత్వం తీసుకుంటుందని, ఇందుకు సంబంధించి జిల్లా కలెక్టరుకు ఆదేశాలు జారీ చేశామని ఆమె శుక్రవారం ఉదయం చెప్పారు. వారికి ఒక ఇంటిని కేటాయించాలని కూడా ఆదేశించినట్లు తెలిపారు. అనూష కేసులో పోలీసుల వైఫల్యం లేదని ఆమె స్పష్టం చేశారు. పోలీసులు అవసరమైన అన్ని చర్యలూ తీసుకున్నారని, అరెస్టు చేసిన తర్వాత బెయిల్ పై వచ్చి ఉన్మాదిగా మారిపోయి అనూషపై అతను దాడి చేయడం బాధాకరమని ఆమె అన్నారు.

పోలీసులు సకాలం స్పందించినప్పటికీ నిందితులు బెయిల్ పై వచ్చి దాడులు చేస్తున్నారని, పోలీసుల వల్ల మాత్రమే ఇటువంటి సంఘటనలను అదుపు చేయడం సాధ్యం కాదని, తల్లిదండ్రుల పెంపకంలో మార్పు రావాలని ఆమె అన్నారు. ర్యాగింగ్ నిరోధక కమిటీలు ఇందుకు సంబంధించి విద్యార్థులకు తగిన కౌన్సెలింగ్ ఇవ్వాలని సూచించినట్లు ఆమె తెలిపారు. యాసిడ్ నిరోధక చట్టానికి సంబంధించి ఆర్డినెన్స్ జారీ చేస్తామని ఆమె చెప్పారు.