గౌతమి ఎక్స్ ప్రెస్సులో దోపిడీ

ఖమ్మం: సికింద్రాబాద్ నుంచి కాకినాడ వెళ్తున్న గౌతమి ఎక్స్ ప్రెస్సులో ఖమ్మం, వరంగల్ జిల్లాల సరిహద్దుల మధ్య బర్లగూడెం వద్ద శుక్రవారం అర్థరాత్రి దాటిన తర్వాత భారీ దోపిడీ జరిగింది. ముగ్గురు దోపిడీ దొంగలు ప్రయాణికులను తుపాకులతో బెదిరించి దోచుకున్నారు. రైలులోని మూడు బోగీల్లో యథేచ్చగా దోపిడీకి పాల్పపడ్డారు. దాదాపు 20 నిమిషాల పాటు రైలును ఆపేసి నగలను, డబ్బులను దోచుకుని ఉడాయించారు. తన వద్ద 20 తులలా బంగారం అపహరించినట్లు ఒక ప్రయాణికురాలు చెప్పింది.

శుక్రవారం అర్థరాత్రి దాటిన తర్వాత ఒంటి గంటా 50 నిమిషాల ప్రాంతంలో దోపిడీ జరిగిందని ప్రయాణికులు చెబుతున్నారు. దోపిడీ దొంగలు డోర్నకల్ లో రైలు ఎక్కి ఉంటారని చెబుతున్నారు. మొత్తం 2 లక్షల విలువైన నగలను దోచుకున్నట్లు అంచనా వేస్తున్నారు. ఈ ఘటనపై సిఆర్పీఎఫ్ పోలీసులు పట్టించుకోలేదని ప్రయాణికులు ఆగ్రహం వ్యక్తం చేస్తున్నారు. దోపిడీకి పాల్పడింది మహారాష్ట్ర ముఠా అయి ఉంటుందనే అనుమానాలు వ్యక్తమవుతున్నాయి. దోపిడీపై రాజమండ్రి, విజయవాడ రైల్వే పోలీసు స్టేషన్లనో ఫిర్యాదు చేశారు.