బీహార్ నక్సలైట్ల ఘాతుకం, 16 మందిని చంపిన మావోలు

పాట్నా: బీహారులోని ఖగారియా జిల్లాలో సాయుధ మావోయిస్టులు 16 మందిని హత్య చేశారు. ఈ సంఘటన గురువారం రాత్రి జరిగినట్లు పోలీసులు శుక్రవారం చెప్పారు. దాదాపు 100 మంది సాయుధ నక్సలైట్లు ఖగారియా జిల్లాలోని అమోసి భరేన్ డయారా గ్రామానికి వచ్చి విచక్షణా రహితంగా కాల్పులు జరిపారని, ఈ కాల్పుల్లో 11 మంది పురుషులు, ఐదుగురు పిల్లలు మరణించారని ఇన్ స్పెక్టర్ జనరల్ (ఆపరేషన్స్) ఎస్కే భరద్వాయి చెప్పారు.

గ్రామంలోని 30 బీగాల భూమి వివాదమే ఈ దాడికి కారణమని చెబుతున్నారు. బాధితులంతా వెనకబడిన కులాలకు చెందినవారు. భూమిని లాక్కునే ఉద్దేశంతో నక్సలైట్లు ఈ దాడికి పాల్పడినట్లు అధికారులు అనుమానిస్తున్నారు. పోలీసు ఉన్నతాధికారులు సంఘటనా స్థలానికి చేరుకున్నారు. ఆ ప్రాంతంలో ముమ్మరంగా గాలింపు చర్యలు చేపట్టారు.