వైయస్ జగన్మోహన్ రెడ్డికి హైకమాండ్ పిలువు?

హైదరాబాద్: కడప పార్లమెంటు సభ్యుడు వైయస్ జగన్ కు కాంగ్రెసు పార్టీ అధిష్టానం నుంచి పిలుపు వచ్చినట్లు హైదరాబాదులో ప్రచారం జరుగుతోంది. జగన్ సోమవారం ఉదయం బెంగుళూర్ నుంచి హైదరాబాద్ వచ్చారు. ఆయన వచ్చిన వెంటనే దక్కన్ క్రానికల్ చైర్మన్ వెంకట్రామిరెడ్డిని పరామర్శించారు. ఆ తర్వాత ఆయన ముఖ్యమంత్రి క్యాంపు కార్యాలయానికి వెళ్లారు. మంత్రి విశ్వరూప్, మంత్రులు, శాసనభ్యులు కొంతమంది ఆయనను కలుసుకున్నారు.

ఈ నెల 21, 22, 23 తేదీల్లో అందుబాటులో ఉండాలని పార్టీ అధిష్టానం జగన్ కు కబురు పంపినట్లు చెబుతున్నారు. మహారాష్ట్ర ఎన్నికల ఫలితాల వెల్లడి తర్వాత ఆంధ్రప్రదేశ్ వ్యవహారాన్ని పార్టీ అధిష్టానం పరిశీలించే అవకాశాలున్నట్లు తొలుత భావించారు. ఈ నెల 22వ తేదీననే మహారాష్ట్రతో పాటు మూడు రాష్ట్రాల ఎన్నికల ఓట్ల లెక్కింపు జరుగుతోంది. రాష్ట్రంలో జగన్ వ్యవహారం పార్టీకి నష్టం కలిగించే అవకాశాలున్న నేపథ్యంలో పరిష్కారానికి కాంగ్రెసు హైకమాండ్ తొందరపడుతున్నట్లు చెబుతున్నారు.