రాహుల్ వెంట పడిన వరుణుడు

హైదరాబాద్: కాంగ్రెసు పార్లమెంటు సభ్యుడు రాహుల్ గాంధీ రాష్ట్ర పర్యటనకు అడుగడుగునా వర్షం ఆటంకంగా మారింది. నిజానికి, ఆయన విజయవాడ పర్యటనే తొలుత అనుమానంగా మారింది. అయితే ఆయన ఢిల్లీ నుంచి విజయవాడకు చేరుకున్నారు. ఆయన గన్నవరం విమానాశ్రయానికి రోడ్డు మార్గంలో చేరుకుని లయోలా కాలేజీ విద్యార్థులతో ఇష్టాగోష్టిలో పాల్గొన్నారు. ఆ తర్వాత గన్నవరం విమానాశ్రయం నుంచి ప్రత్యేక విమానంలో తిరుపతికి బయలుదేరారు.

తిరుపతిలో ఆయన రెండు విశ్వవిద్యాలయ విద్యార్థులతో ఇష్టాగోష్ఠిలో పాల్గొనాల్సి ఉండింది. అయితే భారీ వర్షం కారణంగా ఆయన తిరుపతిలో దిగలేదు. అదే విమానంలో ఆయన ఢిల్లీకి బయలుదేరి వెళ్లారు. రాహుల్ గాంధీని కలుసుకోవడానికి తిరుపతి వెళ్లిన ముఖ్యమంత్రి కె.రోశయ్య రాహుల్ గాంధీ వెళ్లిపోయారని తెలుసుకుని తిరుమలకు చేరుకున్నారు. రాహుల్ గాంధీ బుధవారంనాడు వరంగల్ లోని జాతీయ అథ్లెటిక్ పోటీల కార్యక్రమంలో కూడా పాల్గొనాల్సి ఉండింది. అయితే వర్షం కారణంగానే ఆయన వరంగల్ పర్యటనను రద్దు చేసుకున్నారు.