మహేశ్వరం నుంచి జగన్ ప్రచారం

హైదరాబాద్: గ్రేటర్ హైదరాబాద్ లో తన ఎన్నికల ప్రచారాన్ని కడప పార్లమెంటు సభ్యుడు వైయస్ జగన్ రేపు శుక్రవారం ఉదయం మహేశ్వరం నుంచి ప్రారంభింస్తారు. జగన్ ఎన్నికల ప్రచారం కార్యక్రమాన్ని రాష్ట్ర మున్సిపల్ శాఖ మంత్రి ఆనం రామ నారాయణ రెడ్డి గురువారం మీడియా ప్రతినిధుల సమావేశంలో విడుదల చేశారు. జగన్ మహేశ్వరం, ఎల్బీ నగర్, ఉప్పల్, మల్కాజిగిరి, కుత్బుల్లాపూర్, కూకట్ పల్లి, రాజేంద్రనగర్ తదితర 15 శాసనసభా నియోజక వర్గాల్లో తొలి రోజు శుక్రవారం ప్రచారం చేస్తారని వివరించారు.

రెండో రోజు శనివారం మరో 15 శాసనసభా నియోజక వర్గాల్లో జగన్ ప్రచారం చేస్తారని ఆయన చెప్పారు. రేపు శుక్రవారం రాజీవ్ విగ్రహానికి పూలమాల వేసి నివాళులర్పిస్తారని, ఆ తర్వాత ఇందిరా గాంధీ, బిఆర్ అంబేడ్కర్, బాబూ జగన్ జీవన్ రాం విగ్రహాలకు పూలమాలలు వేసి నివాళులు అర్పిస్తారు. ఆ తర్వాత తన ప్రచార కార్యక్రమాన్ని ప్రారంభిస్తారు.