చానెల్ పై దాడి: పోలీసు కస్టడీకి రౌత్

ముంబై: మరాఠీ చానెల్ పై దాడి కేసులో శివసేన పార్లమెంటు సభ్యుడు సంజయ్ రౌత్ ను ఈ నెల 27వ తేదీ వరకు పోలీసు కస్టడీకి అప్పగిస్తూ కోర్టు బుధవారం ఆదేశాలు జారీ చేసింది. ఐబిఎన్ - లోకమత్ మరాఠీ న్యూస్ చానెల్ కార్యాలయంపై దాడికి ఆయననే సూత్రధారిగా పోలీసులు భావిస్తున్నారు. రౌత్ మంగళవారంనాడు పార్క్ సైడ్ పోలీసు స్టేషనులో లొంగిపోయారు.

నవంబర్ 20వ తేదీన శివసైన కార్యకర్తలు ఐబిఎన్ - లోకమత్ కార్యాలయంపై దాడి చేశారు. ఉద్యోగులను కొట్టారు. తమ నేత బాల్ థాకరేపై వ్యతిరేకంగా వార్తాకథనాలు ప్రసారం చేస్తోందనే ఆగ్రహంతో వారు ఈ దాడికి పాల్పడ్డారు. ఈ కేసులో రౌత్ ప్రధాన నిందితుడు. ఈ కేసులో ఇప్పటికే 14 మంది శివసేన కార్యకర్తలను పోలీసులు ఆరెస్టు చేశారు.