తవ్వకాల నిలిపివేత : 'గాలి'కి ఎదురుదెబ్బ

హైదరాబాద్: ఎట్టకేలకు కర్నాటక మంత్రి గాలి జనార్దన్ రెడ్డి గనుల తవ్వకాలపై రాష్ట్ర ప్రభుత్వం అడుగు ముందుకేసింది. గనుల తవ్వకాలను నిలిపేస్తూ మాత్రమే కాకుండా ఇనుప ఖనిజం రవాణాను ఆపేస్తూ ముఖ్యమంత్రి కె. రోశయ్య బుధవారం రాత్రి ఆదేశాలు జారీ చేశారు. ఆరు కంపెనీలపై ఆంక్షలు విధించగా వాటిలో ఐదు గాలి జనార్దన్ రెడ్డికి చెందినవే. సుప్రీంకోర్టు సాధికార కమిటీ నివేదికలు సమర్పించి, సుప్రీంకోర్టు తీవ్రంగా ప్రతిస్పందించిన నేపథ్యంలో గనుల తవ్వకాలను నిలిపేస్తూ ప్రభుత్వం నిర్ణయం తీసుకుంది.

న్యాయనిపుణుల సలహాలు వచ్చిన తర్వాత గనుల తవ్వకాన్ని నిలిపేస్తూ ఉత్తర్వులు జారీ అవుతాయి. న్యాయ నిపుణుల సలహాలు కూడా లాంఛనమేనని తెలుస్తోంది. గనుల తవ్వకాలు నిలిపేయాలని సిఇసి చెప్పిన ఆరు కంపెనీల్లో ఐదు గాలి జనార్దన్ రెడ్డివే కావడం విశేషం. వీటిలో ఓబుళాపురం మైనింగ్ కంపెనీ పేరుతోనే మూడున్నాయి. అనంతపూర్ మైనింగ్ కంపెనీ కూడా గాలి జనార్దన్ రెడ్డికి చెందిందే. బళ్లారీ మైనింగ్ కంపెనీ, వైఎం అండ్ సన్ కంపనీలు కూడా ఉన్నాయి. వీటిలో వైఎం అండ్ సన్ కంపెనీని కూడా గాలి జనార్దన్ రెడ్డే నిర్వహిస్తున్నారు.