నొప్పి తెలియకుండా జగన్ పై దెబ్బ

న్యూఢిల్లీ: నొప్పి తెలియకుండా కడప పార్లమెంటు సభ్యుడు వైయస్ జగన్ ను కాంగ్రెసు అధ్యక్షురాలు సోనియా గాంధీ దెబ్బ తీశారు. కాంగ్రెసు లెజిస్లేచర్ పార్టీ (సిఎల్పీ), శాసనసభా సమావేశాలను వాయిదా వేస్తూ జగన్ ను లొంగదీయడమే పనిగా పెట్టుకున్న కాంగ్రెసు పార్టీ అధిష్టానం ఆ దిశగా మెల్లగా పావులు కదుపుతూ ఎట్టకేలకు విజయం సాధించిన సూచనలు కనిపిస్తున్నాయి. పులివెందుల శాసనసభా నియోజకవర్గం ఆభ్యర్థిగా దివంగత నేత వైయస్ రాజశేఖర రెడ్డి సతీమణి విజయలక్ష్మి పేరును ఖరారు చేయడమై కాకుండా, ఆమెను పోటీకి ఒప్పించాల్సిన బాధ్యతను కూడా జగన్ పైనే కాంగ్రెసు అధిష్టానం పెట్టింది. ఈ రకంగా జగన్ ను పార్టీ అధిష్టానం ఇరకాటంలో పెట్టింది. ఇది జగన్ శిబిరానికి మింగుడు పడడం లేదు.

విజయలక్ష్మిని శాసనసభకు పోటీ దించడం సరైంది కాదని, ఆమెను అంతకన్నా పెద్ద పదవిలో చూడాలని ఉందని విజయవాడ పార్లమెంటు సభ్యుడు రాజగోపాల్ చేసిన వ్యాఖ్య వైయస్ శిబిరంలోని నైరాశ్యాన్ని బయటపెడుతోంది. సోనియా నిర్ణయానికి అంగీకరించక తప్పని పరిస్థితి కూడా జగన్ కు ఏర్పడింది. ఓబుళాపురం మైనింగ్ కంపెనీ అధినేత గాలి జనార్దన్ రెడ్డిపై చర్యలకు కూడా కాంగ్రెసు నాయకత్వంపై చొరవతోనే ఆచితూచి వ్యవహరించినట్లు కనిపిస్తోంది. గాలి జనార్దన్ రెడ్డిపై చర్యలు తీసుకోవడం ద్వారా జగన్ ఆదాయ మార్గానికి గండి పెట్టడం ఒక వ్యూహంగా కాంగ్రెసు నాయత్వం అమలు చేసినట్లు చెబుతున్నారు. ఒక వేళ జగన్ తిరుగుబాటు చేస్తే కాంగ్రెసు నాయకత్వం నుంచి ఎదుర్కోవాల్సిన సంక్లిష్టపరిస్థితిని కూడా జగన్ అంచనా వేసుకున్నట్లు చెబుతున్నారు. జార్ఖండ్ మాజీ ముఖ్యమంత్రి మధుకోడాపై బిగిస్తున్న ఉచ్చు, గాలి జనార్దన్ రెడ్డిపై చర్యలు జగన్ కు హెచ్చరికలలాంటివని అంటున్నారు. ఈ స్థితిలో జగన్ సోనియా మాటలను కాదనలేని పరిస్థితిని కల్పించినట్లు భావిస్తున్నారు.

జగన్ 2014 వరకు కూడా ముఖ్యమంత్రి పదవిపై ఆశ పెట్టుకోలేని పరిస్థితిని పార్టీ అధిష్టానం కల్పించింది. ఈ విషయాన్ని జగన్ కు సోనియా గాంధీ స్పష్టం చేసినట్లే అయింది. ప్రస్తుతం వివిధ కారణాల వల్ల జగన్ వైపు పార్టీ నాయకులే కాకుండా కార్యకర్తలు కూడా ఏదో మేరకు ఉన్నారు. జగన్ లాబీ లొల్లి చేయడం ద్వారా అధిష్టానంపై ఒత్తిడి తెచ్చే వ్యూహాన్ని అమలు చేసింది. అయితే, రాష్ట్ర రాజకీయాల్లో క్రియాశీలక పాత్ర లేకుండా, తన ఆదాయ మార్గాలను పెంచుకునే అవకాశం లేకుండా జగన్ తన వర్గాన్ని వచ్చే ఎన్నికల వరకు నిలుపుకోగలరా అనేది కూడా సందేహమే.