వైయస్సార్ మృతికి అసెంబ్లీ సంతాపం

హైదరాబాద్: దివంగత ముఖ్యమంత్రి వైయస్ రాజశేఖర రెడ్డికి శాసనసభ, శాసన మండలి సోమవారం సంతాపం ప్రకటించింది. సంతాప తీర్మానాన్ని ముఖ్యమంత్రి కె. రోశయ్య శాసనసభలో ప్రతిపాదించగా, శాసనమండలిలో రెవెన్యూ మంత్రి ధర్మాన ప్రసాద రావు ప్రతిపాదించారు. రోశయ్య సంతాప తీర్మానం ప్రతిపాదించే సమయంలో తెలంగాణ రాష్ట్ర సమితి (తెరాస) శాసనసభ్యులు అడ్డుకునే ప్రయత్నం చేశారు. జై తెలంగాణ నినాదాలు చేశారు. దీనిపై స్పీకర్ కిరణ్ కుమార్ రెడ్డి తీవ్ర ఆగ్రహం వ్యక్తం చేశారు. సంప్రదాయాలను పాటించాలని ఆయన సూచించారు. మిగతా పార్టీల సభ్యులు సర్ది చెప్పడంతో తెరాస సభ్యులు సద్దుమణిగారు.

వైయస్ రాజశేఖర రెడ్డికి నివాళి అర్పిస్తూ ప్రతిపాదించిన ముఖ్యమంత్రి కె. రోశయ్య వైయస్ రాజశేఖర రెడ్డి నాయకత్వ ప్రతిభను ప్రశంసించారు. విధి బలీయమైందని, దాంతో తాము గొప్ప నాయకుడిని కోల్పోయామని ఆయన అన్నారు. తనకు, వైయస్ రాజశేఖర రెడ్డికి మధ్య వ్యక్తిగత విభేదాలు లేవని ప్రతిపక్ష నేత నారా చంద్రబాబు నాయుడు అన్నారు. పార్టీ విధానాల పరంగా వ్యతిరేకించుకున్నామని ఆయన చెప్పారు. వైయస్ మరణం రాజకీయాలకు, ముఖ్యంగా కాంగ్రెసు పార్టీ తీరని నష్టమని ఆయన అన్నారు.

చిరునవ్వుతో వైయస్ రాజశేఖర రెడ్డి ప్రయత్నించేవారని ప్రజారాజ్యం పార్టీ నేత చిరంజీవి చెప్పారు. తాను వైయస్ చూసి నేర్చుకునే అవకాశం ఏర్పడిందని ఆయన చెప్పారు. వైయస్ లేరంటే నమ్మడానికి వీలు లేకుండా ఉందని ఆయన అన్నారు. కొత్తగా రాజకీయాల్లోకి వచ్చినవారికి వైయస్ వ్యక్తిత్వం, మనస్తత్వం నేర్చుకోవడానికి అవకాశం కలిగించేదని ఆయన అన్నారు. వ్యక్తిత్వం స్ఫూర్తినిచ్చేదని ఆయన అన్నారు. అసెంబ్లీ ఫ్లోర్ లీడర్ జె. గీతారెడ్డి తదితరులు మాట్లాడారు.