హై కమాండ్ దూత కెసిఆర్ తో మాట్లాడ్తారు

హైదరాబాద్: తమ పార్టీ అధిష్టానం దూత తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావుతో మాట్లాడ్తారని కాంగ్రెసు సీనియర్ నేత పాల్వాయి గోవర్దన్ రెడ్డి చెప్పారు. ఇప్పటికిప్పుడు పార్టీ అధిష్టానం తెలంగాణపై ప్రకటన చేయడం సాధ్యం కాదని ఆయన సోమవారం మీడియా ప్రతినిధులతో అన్నారు. కెసిఆర్ దీక్ష విరమించాలని ఆయన కోరారు. తెలంగాణ అంశంపై తమ పార్టీ అధ్యక్షురాలు సోనియా గాంధీ సీరియస్ గా ఆలోచిస్తున్నట్లు ఆయన తెలిపారు. కాగా, ఢిల్లీలోని పార్లమెంటు ఆవరణలో కాంగ్రెసు పార్లమెంటు సభ్యుడు మధు యాష్కీ సోనియా గాంధీని కలిశారు. తాజా పరిస్థితిపై ఆయన సోనియాకు వివరించారు.

ఇదిలా వుంటే, మాజీ మంత్రి ఆర్ దామోదర్ రెడ్డి నివాసంలో కాంగ్రెసు తెలంగాణ శాసనసభ్యులు, ఎమ్మెల్సీలు సమావేశమయ్యారు. తెలంగాణపై పార్టీపై ఒత్తిడి తెచ్చేందుకు ఈ సమావేశం ఏర్పాటు చేశారు. ఈ సమావేశానికి మాజీ మంత్రి కె. జానారెడ్డి చొరవ ప్రదర్శించారు. అంతా కలిసి సోనియాను కలిసే ఉద్దేశంతో వారున్నారు. అయితే శాసనసభ్యుడు విష్ణువర్ధన్ రెడ్డి సమావేశాన్ని బహిష్కరించారు. తన తండ్రి పి. జనార్దన్ రెడ్డి పోతిరెడ్డిపాడుపై, 610 జీవోపై ఎందుకు మాట్లాడలేదని, ఇప్పుడు మాట్లాడడంలో అర్థమేమిటని ఆయన ప్రశ్నించారు. అప్పుడే మాట్లాడి ఉంటే తన తండ్రి మరణించి ఉండేవారు కారని ఆయన అన్నారు.