తెలంగాణపై అంత తేలిక కాదు: రోశయ్య

హైదరాబాద్: తెలంగాణపై కేంద్రానికి సమయం ఇవ్వాలని ముఖ్యమంత్రి కె.రోశయ్య తెలంగాణ రాష్ట్ర సమితి (తెరాస) శాసనసభ్యులకు సూచించారు. తెలంగాణపై తీర్మానం చేయాలంటూ తెరాస సభ్యులు శాసనసభా కార్యక్రమాలను బుధవారం తెరాస సభ్యులు స్తంభింపజేశారు. ఈ సమయంలో ముఖ్యమంత్రి జోక్యం చేసుకుని మాట్లాడారు. సమస్యను శాంతియుతంగా, చర్చల ద్వారా పరిష్కారం చేసుకుందామని ఆయన అన్నారు. జననష్టం, ఆస్తినష్టం, విధ్వంసం జరగకుండా చూడడం అవసరమని ఆయన అన్నారు. తెలంగాణ అంశం రాష్ట్ర, కేంద్ర ప్రభుత్వాల దృష్టిలో ఉందని ఆయన చెప్పారు.

తెలంగాణపై తీర్మానం చేయడం అంత తేలిక కాదని ఆయన చెప్పారు. ఈ సమయంలో హరీష్ రావు లేచి మాట్లాడారు. దానికి రోశయ్య ప్రతిస్పందిస్తూ బాధను వ్యక్తం చేయడానికి కూడా ఒక పద్ధతి ఉంటుందని, తెలంగాణ సున్నితమైన అంశమని, ఏ ప్రాంతానికి చెందిన వారు కూడా ఉద్రేకాలకు లోను కావద్దని ఆయన అన్నారు. తెలంగాణ అనేది తనంత తాను లేచి తీర్మానం చేసేది కాదని ఆయన స్పష్టం చేశారు. ఎస్సీ వర్గీకరణలాగానో, ముస్లింలకు రిజర్వేషన్లు కల్పించడం లాగానో తెలంగాణపై తీర్మానం చేయాలంటే అంత తేలిక కాదని ముఖ్యమంత్రి అన్నారు. తెలంగాణపై ప్రభుత్వం బాధ్యత తీసుకుని వ్యవహరిస్తుందని ఆయన అన్నారు.