తెలంగాణ హోరు: లోకసభ వాయిదా

న్యూఢిల్లీ: జై తెలంగాణ, జై సమైక్యాంధ్ర నినాదాలతో గురువారం కూడా లోకసభ దద్ధరిల్లింది. ఆంధ్రప్రదేశ్ సభ్యులు రెండుగా విడిపోయి ఆందోళనకు దిగడంతో సభా కార్యక్రమాలు స్తంభించాయి. దీంతో సభను స్పీకర్ మీరా కుమార్ 15 నిమిషాల పాటు వాయిదా వేశారు. సభ సమావేశం కాగానే ప్రశ్నోత్తరా సమయంలో తెలుగుదేశం సీమాంధ్ర పార్లమెంటు సభ్యులు జై సమైక్యాంధ్ర అంటూ స్పీకర్ పోడియం వద్దకు దూసుకెళ్లారు. మరి కొంత మంది తెలంగాణకు అనుకూలంగా నినాదాలు చేశారు. అయితే వారు తమ సీట్లలోంచి కదలలేదు.

తెలుగుదేశం తెలంగాణ పార్లమెంటు సభ్యుడు మందా జగన్నాథం జై తెలంగాణ ప్లకార్డుతో స్పీకర్ పోడియం వద్ద నించున్నారు. మాట్లాడడానికి జీరో అవర్ లో అవకాశం ఇస్తానని చెప్పినా తెలుగుదేశం సభ్యులు వినలేదు. ప్లకార్డులు ప్రదర్శించవద్దని, సభలో ఇటువంటి సంప్రదాయం ప్రవేశవెట్టవద్దని మీరా కుమార్ సూచించారు. సభ పవిత్రతను కాపాడాలని, క్రమశిక్షణతో మెలగాలని కూడా ఆమె చెప్పారు. అయినా సభ సద్దుమణగకపోవడంతో స్పీకర్ సభను వాయిదా వేశారు. తిరిగి సమావేశమైన తర్వాత సభ ప్రశాంతంగా సాగింది.