తెలంగాణ అంతటా పూర్తి బంద్

హైదరాబాద్: తెలంగాణ అంతటా బంద్ ప్రారంభమైంది. పలు ప్రాంతాల్లో బుధవారం రాత్రి నుంచే బంద్ వాతావరణం మొదలైంది. పలు చోట్ల ఆందోళనకారులు బస్సులకు, ప్రైవేట్ వాహనాలకు నిప్పు పెట్టారు. రహదారులను దిగ్బంధం చేశారు. రాస్తారోకోలు, ప్రదర్శనలు చేపట్టారు. హైదరాబాదులో బంద్ వాతావరణం సంపూర్ణంగా కనిపిస్తోంది. సబర్బన్ రైళ్లు బందయ్యాయి. తెలంగాణలోని అన్ని ప్రాంతాల్లో బస్సులు ఎక్కడికక్కడే ఆగిపోయాయి. కరీంనగర్ జిల్లా మానకొండూరు మండలం వూటూరులో గ్రామపంచాయతీ కార్యాలయానికి నిప్పు పెట్టారు. కరీంనగర్ జిల్లాలో బంద్ ప్రభావం తీవ్రంగా కనిపిస్తోంది. తెలంగాణకు మద్దతుగా సింగరేణి గనుల్లో బంద్ ప్రకటించారు.

తెలంగాణలో రైళ్ల రాకపోకలకు కూడా అంతరాయం కలుగుతోంది. రాయలసీమ, కోస్తాంధ్ర నుంచి తెలంగాణకు వచ్చే బస్సులను రద్దు చేశారు. నల్లగొండ, మహబూబ్ నగర్, వరంగల్, మెదక్ జిల్లాల్లో బంద్ ప్రశాంతంగా జరుగుతోంది. అన్ని జిల్లాల్లో బంద్ ప్రభావం తీవ్రంగా ఉంది. న్యాయవాదులు కోర్టులను బహిష్కరించాలని నిర్ణయించారు. వరంగల్ జిల్లా డోర్నకల్ లో పుష్పుల్ రైలును ఆందోళనకారులు నిలిపేశారు. వ్యాపార, వాణిజ్య సంస్థలను మూసేశారు.