తెలంగాణపై సోనియా వెనక్కి పోయారు: ఎర్రబెల్లి దయాకర రావు

హైదరాబాద్: తెలంగాణపై కాంగ్రెసు అధ్యక్షురాలు సోనియా గాంధీ వెనక్కిపోయారని తెలుగుదేశం శాసనసభ్యుడు ఎర్రబెల్లి దయాకర రావు విమర్శించారు. తెలంగాణకు అనుకూలంగా 48 గంటల బంద్ కు తాము మద్దతిస్తున్నట్లు ఆయన గురువారం మీడియా ప్రతినిధుల సమావేశంలో చెప్పారు. బంద్ ను ప్రశాంతంగా నిర్వహించాలని ఆయన ప్రజలను, విద్యార్థులను కోరారు. పోలీసు బలగాలను దించే విషయంలో ముఖ్యమంత్రి కె. రోశయ్య పక్షపాత వైఖరి అవలంబిస్తున్నారని ఆయన తప్పు పట్టారు. పోలీసు బలగాలను దించి ప్రజలను రెచ్చగొట్టే ప్రయత్న చేస్తోందని ఆయన అన్నారు. సంభవించే పరిణామాలకు కాంగ్రెసు ప్రభుత్వమే బాధ్యత వహించాలని ఆయన హెచ్చరించారు.

రాయలసీమ, కోస్తాంధ్రల్లో విధించని 144 సెక్షన్ తెలంగాణలో విధించారని, ఇది ప్రభుత్వ పక్షపాత వైఖరికి నిదర్శనమని ఆయన అన్నారు. పోలీసులు విద్యార్థులను పశువులను కొట్టినట్లు కొడుతున్నారని, తరిమి తరిమి కొడుతున్నారని ఆయన ఆరోపించారు. ఈ వైఖరిని రోశయ్య మానుకోవాలని ఆయన డిమాండ్ చేశారు. అన్ని రాజకీయ పార్టీల జెఎసి సమావేశానికి తాము మోత్కుపల్లి నర్సింహులు, ఎల్ రమణ, పోచారం శ్రీనివాస రెడ్డి, రేవూరి ప్రకాష్ రెడ్డిని ప్రతినిధులుగా పంపినట్లు ఆయన తెలిపారు. జెఎసికి రాజకీయేతరులు నాయకత్వం వహిస్తేనే తాము అందులో చేరుతామని ఆయన చెప్పారు.