తెలంగాణపై చిదంబరం ఓవరాక్షన్: గాలి ముద్దుకృష్ణమ నాయుడు

విజయవాడ: రాష్ట్ర విభజనపై కేంద్ర హోం మంత్రి పి.చిదంబరం ఓవర్ యాక్షన్ చేస్తున్నారని తెలుగుదేశం పార్టీ నాయకుడు గాలి ముద్దుకృష్ణమ నాయుడు వ్యాఖ్యానించారు. కేంద్ర ప్రభుత్వ వైఫల్యం వల్లనే రాష్ట్రంలో సంక్షోభం నెలకొందని ఆయన శనివారం మీడియా ప్రతినిధుల సమావేశంలో అన్నారు. ముఖ్యమంత్రి కె.రోశయ్యను సంప్రదించకుండా కేందర్ మంత్రి పి. చిదంబరం తెలంగాణపై ఎలా ప్రకటన చేస్తారని ఆయన ప్రశ్నించారు. ముందు తమిళనాడులో రాష్ట్ర విభజన ప్రక్రియను ప్రారంభించి ఆ తర్వాతనే ఆంధ్రప్రదేశ్ కు రావాలని ఆయన చిదంబరాన్ని డిమాండ్ చేశారు.

చిన్న రాష్ట్రాల ఏర్పాటును స్వర్గీయ ఇందిరాగాంధీ వ్యతిరేకించేవారని, అదే విధానాన్ని ఆణె కోడలు సోనియా గాంధీ పాటించాలని ఆయన అన్నారు. సమైక్యాంధ్ర ఉద్యమం నీరు గారలేదని, అది మరింత బలపడుతుందని ఆయన అన్నారు. చిన్న రాష్ట్రాల ఏర్పాటుపై కాంగ్రెసు గానీ యుపిఎ గానీ వివరణ ఇవ్వకుండా తెలంగాణపై రాజకీయ పార్టీలను ఎలా చర్చలకు పిలుస్తారని ఆయన ప్రశ్నించారు. తెలంగాణపై కాంగ్రెసు, యుపిఎ వైఖరి చెప్పిన తర్వాతనే చర్చలకు ఆహ్వానించాలని ఆయన డిమాండ్ చేశారు. యుపిఎ భాగస్వామ్య పార్టీలకు చెందిన నాయకులు మమతా బెనర్జీ, శరద్ పవార్ లాంటివారు కూడా తెలంగాణ రాష్ట్ర ఏర్పాటును వ్యతిరేకిస్తున్నారని ఆయన గుర్తు చేశారు.