అరెస్టులపై పోలీసులకు సుప్రీం సీరియస్ వార్నింగ్..! ఇకపై అలా చేస్తే..?

దేశవ్యాప్తంగా చిన్న చిన్న కారణాలకే అరెస్టులు చేస్తూ, పౌరుల వ్యక్తిగత స్వేచ్ఛను హరిస్తున్న పోలీసులకు సుప్రీంకోర్టు (Supreme Court) ఇవాళ ఘాటు హెచ్చరికలు చేసింది. అరెస్టుకు గల కారణాలను లిఖితపూర్వకంగా తెలియజేయకుండా ఒక వ్యక్తిని అరెస్టు చేసిన పోలీసు అధికారిపై క్రమశిక్షణ చర్యలు తీసుకోవాలని సుప్రీంకోర్టు ఆదేశించింది. రాజ్యాంగంలోని ఆర్టికల్ 22(1) ప్రకారం అరెస్టుకు సంబంధించిన కారణాలను లిఖితపూర్వకంగా అందించకపోతే, ఆ అరెస్టు చట్టవిరుద్ధం అవుతుందని జస్టిస్ ఉజ్జల్ భుయాన్, జస్టిస్ అతుల్ ఎస్. చందుర్కర్‌లతో కూడిన ధర్మాసనం పేర్కొంది.

ఒకసారి చేసిన అరెస్టు చట్టవిరుద్ధమని తేలాక, దర్యాప్తు సంస్థ ఆ వ్యక్తిని మళ్లీ అరెస్టు చేయాలనుకుంటే, ముందుగా అరెస్టుకు గల కారణాలను తెలియజేయడంతో పాటు సంబంధిత మేజిస్ట్రేట్ అనుమతిని పొందాల్సి ఉంటుందని సుప్రీం తెలిపింది. పాలనా పరంగా చూస్తే, అరెస్టు కారణాలను తెలియజేయడంలో విఫలమైన పోలీసు అధికారి, ఆ నిందితుడిని మరింత కాలం కస్టడీలో ఉంచడానికి ఉన్నతాధికారి నుండి అనుమతి పొందాల్సి ఉంటుంది. ఉన్నతాధికారి తదుపరి దర్యాప్తును వేరొక అధికారికి అప్పగించడంతో పాటు, సదరు పోలీసు అధికారిపై శాఖాపరమైన విచారణకు ఆదేశించాలని తెలిపింది. విచారణలో ఆ అధికారికి వ్యతిరేకంగా ప్రతికూల అంశాలు వెల్లడైతే, వారిపై శాఖాపరమైన చర్యలు తీసుకోవడంతో పాటు ఆ విషయాన్ని వారి సర్వీసు బుక్‌లో నమోదు చేయాలని ఆదేశించింది. ఈ తీర్పు ప్రతిని అన్ని రాష్ట్రాలు మరియు కేంద్రపాలిత ప్రాంతాల డీజీపీలకు పంపింది.

మైనర్‌పై లైంగిక దాడి ఆరోపణలకు సంబంధించి అకాలీ దళ్ కు చెందిన ముల్లాన్‌పూర్ దాఖా నియోజకవర్గ ఇన్‌ఛార్జ్ జస్కరన్‌జిత్ సింగ్ అరెస్టును సుప్రీంకోర్టు చట్టవిరుద్ధమని ప్రకటించింది. అరెస్టుకు గల కారణాలను అతనికి తెలియజేయకపోవడమే ఇందుకు కారణం. సింగ్ అరెస్టు చట్టవిరుద్ధమని పేర్కొంటూ తక్షణమే విడుదల చేయాలని స్థానిక కోర్టు ఇచ్చిన ఆదేశాలపై పంజాబ్ -హర్యానా హైకోర్టు స్టే విధించడంతో, ఆయన సుప్రీంకోర్టును ఆశ్రయించారు. ఈ అప్పీల్ విస్తృత రాజ్యాంగ ప్రాముఖ్యత కలిగిన ఒక కీలకమైన ప్రశ్నను లేవనెత్తుతోందని తీర్పును వెలువరిస్తూ జస్టిస్ భుయాన్ పేర్కొన్నారు. అరెస్టుకు గల కారణాలు తప్పనిసరిగా రాతపూర్వకంగా, నిందితునికి అర్థమయ్యే భాషలో ఉండాలని, అరెస్టుకు గల కారణాల కాపీని ఎటువంటి మినహాయింపు లేకుండా, తప్పనిసరిగా అరెస్టు చేయబడిన వ్యక్తికి అందించాలని తెలిపింది. అరెస్టుకు గల కారణాల గురించి రాతపూర్వకంగా తెలుసుకునే ప్రాథమిక, చట్టబద్ధమైన హక్కు నిందితునికి ఉందని పేర్కొంది. దీన్ని వీలైనంత త్వరగా, తప్పనిసరిగా అరెస్టు చేసిన వ్యక్తికి అందించాలని తెలిపింది. ఏదైనా ఉల్లంఘన లేదా పాటించకపోవడం జరిగితే, అరెస్టు చేయబడిన వ్యక్తిని తక్షణమే విడుదల చేయాల్సి ఉంటుంది, ఎందుకంటే అటువంటి అరెస్టు రాజ్యాంగ విరుద్ధమని తేల్చింది.