సరిగా సాగలేకపోతున్న బిజెపి 'జై ఆంధ్ర' దుకాణం

విజయవాడ: జై ఆంధ్ర ప్రచారాన్ని భుజాన వేసుకున్న భారతీయ జనతా పార్టీ ప్రజల్లోకి ఎలా వెళ్లాలో తెలియక తికమకపడుతోంది. సమైక్యవాదుల ముట్టడి, హెచ్చరికలు, బెదిరింపులు వెరసి పార్టీలో అయోమయ పరిస్థితులు నెలకొన్నాయి. జై ఆంధ్ర ప్రచారాన్ని శాంతియుతంగా ప్రదర్శనలు, కరపత్రాల ద్వారా ప్రజల్లోకి తీసుకెళ్లాలని బీజేపీ భావిస్తోంది. కేంద్ర, రాష్ట్ర నాయకులతో ముఖ్య నగరాల్లో బహిరంగ సభలను నిర్వహించాలని నిర్ణయించింది. అయితే అవి కార్యరూపం దాల్చడానికి ముహూర్తమే చిక్కడంలేదు. ఆది నుంచి ఏదో ఒక అడ్డంకి తగులుతుండడంతో పార్టీ వర్గాల్లో ఆందోళన నెలకొంది. జై ఆంధ్ర ఉద్యమానికి శ్రీకారం చుడుతున్నట్లు గతనెల 28వ తేదీన ఆపార్టీ రాష్ట్ర అధ్యక్షుడు బండారు దత్తాత్రేయ ప్రకటించారు.

ఈనేపథ్యంలో నగరంలో డిసెంబరు 29వ తేదీన బీజేపీ కార్యాలయం దీనదయాళ్‌ భవన్‌లో జిల్లా, నగర నాయకులు సమావేశమయ్యారు. ఈ విషయం తెలుసుకున్న సమైక్యవాదులు కొందరు కార్యాలయాన్ని ముట్టడించారు. ఈలోపు కొత్త సంవత్సర వేడుకలు రానేవచ్చాయి. ఆ రోజున బీజేపీ, మరికొందరు ప్రత్యేక ఆంధ్రను కోరుతున్నవారితో కలసి ప్రచారాన్ని నిర్వహించాలని నిర్ణయించింది. అయితే తాజాగా సమైక్యాంధ్రవాదులు ఉద్యమాన్ని తీవ్రతరం చేసేందుకు నిర్ణయించడంతో తమ ప్రచార నిర్వహణపై పార్టీలో అయోమయ పరిస్థితులు నెలకొన్నాయి. కేంద్రప్రభుత్వం 5న జరిపే సమావేశం ఫలితాలను బట్టి జై ఆంధ్ర ప్రచారాన్ని ప్రారంభిస్తేనే మేలని కొందరు సీనియర్‌ నాయకులు భావిస్తున్నారు.