తెలంగాణపై డెడ్ లైన్లు సరి కాదు: పొన్నం

హైదరాబాద్: తెలంగాణపై కేంద్రం ప్రకటనకు డెడ్ లైన్లు పెట్టడం సరి కాదని కాంగ్రెసు తెలంగాణ పార్లమెంటు సభ్యుడు పొన్నం ప్రభాకర్ అన్నారు. తెలంగాణపై కేంద్రం స్పష్టమైన ప్రకటన చేయాలని ప్రజాప్రతినిధులు రాజీనామా చేయడం కూడా సరి కాదని ఆయన సోమవారం మీడియా ప్రతినిధులతో అన్నారు. తెలంగాణపై ఈ నెల 28వ తేదీలోగా కేంద్ర ప్రభుత్వం ప్రకటన చేస్తుందని ఆశిస్తున్నట్లు ఆయన తెలిపారు. తెలంగాణ ఏర్పాటుకు కాలపరిమితిని విధిస్తూ ప్రకటన చేయాలని కేంద్రాన్ని కోరేందుకు త్వరలోనే తెలంగాణ కాంగ్రెసు పార్లమెంటు సభ్యులు, మంత్రులు డిల్లీ వెళ్తారని ఆయన అన్నారు.

తాము రెండు, మూడు రోజుల్లో ఢిల్లీ వెళ్లి పార్టీ అధిష్టానానికి చెందిన నాయకులను కలుస్తామని, తెలంగాణపై కాలపరిమితితో కూడిన ప్రకటన చేయాలని కోరుతామని ఆయన చెప్పారు. అఖిల పక్ష సమావేశం తర్వాత కేంద్రం ప్రకటన చేయకపోవడం వల్ల తెలంగాణ ప్రజల్లో ఆందోళన నెలకొందని ఆయన అన్నారు. తెలంగాణపై స్పష్టమైన ప్రకటన చేయాలని తాము మరోసారి విన్నవిస్తామని ఆయన చెప్పారు.