తేడా వస్తే పోరాడుదాం: సమైక్య నేతలు

తెనాలి: తెలంగాణ రాష్ట్ర ఏర్పాటు ప్రక్రియతో కేంద్ర ప్రభుత్వం కమిటీ వేస్తే ఉద్యమిద్దామని సమైక్యవాద నేతలు నిర్ణయించుకున్నారు. గుంటూరు జిల్లా తెనాలిలో శుక్రవారం సాయంత్రం జరిగిన సమైక్య సదస్సు ఈ మేరకు నిర్ణయం తీసుకుంది. తెలంగాణపై కేంద్రం కమిటీ వేయగానే విభజన జరిగిపోదని, ఏ ఉద్దేశంతో కమిటీ వేస్తోందో కేంద్రం ఇప్పటి వరకు స్పష్టం చేయలేదని, స్పష్టత వచ్చే వరకు ఆగుదామని, కమిటీని స్వాగతిద్దామని, ఏమై తేడా వస్తే ఉద్యమిద్దామని వారు నిర్ణయించుకున్నారు. ఈ సదస్సులో కాంగ్రెసు నాయకులు లగడపాటి రాజగోపాల్, అంబటి రాంబాబు, తెలుగుదేశం నాయకులు దేవినేని ఉమా మహేశ్వర రావు, యడ్లపాటి వెంకటేశ్వరావు, ఉమ్మారెడ్డి వెంకటేశ్వర్లు, యనమల రామకృష్ణుడు తదితరులు పాల్గొన్నారు.

అందరినీ కలిపింది తెలుగు భాషేనని, అందరం కలిసి ఉండడానికి పొట్టి శ్రీరాములు, పుచ్చలపల్లి సుందరయ్య, ఎన్టీఆర్, వైయస్సార్ స్ఫూర్తితో పని చేద్దామని కాంగ్రెసు నేత లగడపాటి రాజగోపాల్ అన్నారు. రాష్ట్రాన్ని ముక్కలు చేయడాన్ని సహించబోమని ఆయన హెచ్చరించారు. అన్ని ప్రాంతాలు కలిసి ఉండడానికి కారణాలు చెప్పమంటున్నారని, తాను లక్ష కారణాలు చెబుతానని ఆయన అన్నారు. హైదరాబాదులో ఆంధ్రా హోటళ్లు మూయిస్తారా, కెసిఆర్ ను అడిగి అనుమతులు తీసుకోవాలా, ఆంధ్ర ఎవరి సొత్తో కాదని ఆయన అన్నారు. తాము ఎన్నికల్లో కెసిఆర్ తో పొత్తు పెట్టుకుని ఓడిపోయామని, ఆయన స్వయంగా ఓడిపోయారని, అప్పటి నుంచే డ్రామాలు మొదలయ్యాయని దేవినేని ఉమామహేశ్వర రావు అన్నారు. వ్యక్తిగత ప్రయోజనాల కోసమే తెలంగాణ కావాలని అంటున్నారని తెలుగుదేశం నాయకుడు కోడెల శివప్రసాద రావు చెప్పారు.