కృష్ణాజిల్లా అభివృద్ధిపై 16 న సిఎం సమీక్ష

విజయవాడ: కృష్ణాజిల్లా అభివృద్ధిపై సీఎం రోశయ్య 16వ తేదీన సమీక్ష నిర్వహించనున్నారు. తొలుత 10వ తేదీనే సమీక్ష జరపాలని భావించినప్పటికీ ముఖ్యమంత్రి ఢిల్లీ పర్యటన కారణంగా 16కు మార్పు చేశారు. ఆ రోజుకు జిల్లాకు సంబంధించిన ప్రగతి నివేదికల తయారీకి కలెక్టర్‌ పీయూష్‌కుమార్‌ సన్నద్ధమవుతున్నారు. ఇందుకు వివిధ శాఖల అధికారులతో మచిలీపట్నంలోని కలెక్టర్‌ కార్యాలయంలో 9వ తేదీన సమావేశం ఏర్పాటు చేశారు. దానిలో ప్రగతి నివేదికల తయారీకి తగు సూచనలు, సలహాలు ఇవ్వనున్నారు.

రాజధానిలో జరిగే సీఎం సమీక్షకు జిల్లా మంత్రి కేపీ సారథి, ఇన్‌చార్జిమంత్రి పెద్దిరెడ్డి రామచంద్రరెడ్డి, శాసన సభ్యులు, కలెక్టరు హాజరవుతారు. ప్రగతి నివేదికలపై సీఎం ఏవైనా సందేహాలు వ్యక్తం చేస్తే వెంటనే నివృత్తి చేయడానికి వీలుగా విజయవాడలోని వీడియో కాన్ఫరెన్స్‌హాలులో జిల్లా అధికారులను అందుబాటులో ఉంచనున్నారు. ఇప్పటికే కలెక్టర్‌ రోజుకో ప్రభుత్వశాఖను సమీక్షిస్తూ నోట్స్‌ తయారు చేస్తున్నారు. దాదాపు అన్ని శాఖల ప్రగతి, ఎదురవుతున్న సమస్యలపై పూర్తిగా అవగాహన పెంచుకునేందుకు ఆయన ప్రయత్నిస్తున్నారు.