తెలంగాణ ఏర్పాటుకు బొత్సా ఓకె

హైదరాబాద్: రాష్ట్ర విభజన ఆలోచనను కోస్తాంధ్రకు చెందిన రాష్ట్ర మంత్రి బొత్సా సత్యనారాయణ సమర్థిస్తున్నారు. తెలుగు మాట్లాడేవారికి రెండు రాష్ట్రాలు ఉంటే తప్పేమీ లేదని ఆయన శుక్రవారం మీడియా ప్రతినిధులతో అన్నారు. అధిష్టానం ఏ నిర్ణయం తీసుకున్నా తాను దానికి కట్టుబడి ఉంటానని చెప్పారు. ఒకే రాష్ట్రంగా ఉండడం వల్ల కలిగే అదనపు ప్రయోజనం ఏమీ లేదని ఆయన అభిప్రాయపడ్డారు. ఇప్పుడు రాష్ట్రం నుంచి 33 మంది ఎంపీలు ఉంటే దక్కింది కేంద్రంలో ఒక్క కేబినెట్ మంత్రి పదవేనని, గతంలో తెలుగుదేశం పార్టీకి 25 మంది ఎంపీలున్నప్పుడు దక్కింది కూడా ఒక్కటేనని ఆయన అన్నారు.

రెండు రాష్ట్రాలుంటే ఇద్దరు ముఖ్యమంత్రులుండి తెలుగువారి ప్రయోజనాలు కాపాడుతారని ఆయన అన్నారు. ప్రాతినిధ్యపరంగా చూస్తే కేంద్రంలో గోవా సిఎంనూ మన సిఎంనూ ఒకే రకంగా చూస్తారని ఆయన అన్నారు. శ్రీకృష్ణ కమిటీకి తాను లేఖ రాస్తానని ఆయన చెప్పారు. ప్రాంతీయ అసమానతలు తలెత్తడానికి గల కారణాలు వివరిస్తానని ఆయన చెప్పారు. హైదరాబాదులో పరిశ్రమలు పెట్టినవారిలో 95 శాతం మంది సీమాంధ్రవారున్నారని, ఐదు శాతం మంది మాత్రమే తెలంగాణవారని ఆయన అన్నారు విజయనగరం జిల్లాకు చెందిన సామాన్యులు హైదరాబాదు తాము ఎందుకు రావాలని అనుకుంటున్నారని ఆయన అన్నారు. విజయవాడ రాజధాని అయితే దాని చుట్టూ ఉన్న ప్రాంతాలు అభివృద్ధి చెందుతాయని ఆయన అన్నారు.