కెకెను జెసి దివాకర్ రెడ్డి ఎందుకు కలిశారు?

హైదరాబాద్‌: మాజీమంత్రి జేసీ దివాకర్‌ రెడ్డి కాంగ్రెస్‌ సీనియర్‌నేత కె కేశవరావుతో భేటి అయ్యారు. గంటకుపైగా ఈ సమావేశం జరిగినా ఇందులో ఎలాంటి ప్రాధాన్యత లేదని జేసీ దివాకర్‌ రెడ్డి చెప్పారు. కేవలం పాత స్నేహితుడిగానే కేకేను కలవడానికి వచ్చినట్లు జేసీ స్పష్టం చేశారు. కానీ దివాకర్ రెడ్డి సీమాంధ్ర రాజకీయాలకు సంబంధించిన ఒక ముఖ్య విషయం కెకెకు చెప్పి, అదే విషయాన్ని సోనియాగాంధీ చెవిలో వేయమని చెప్పినట్టు తెలిసింది.

అన్ని ప్రాంతాల ప్రజల మనోభావాలను దృష్టిలో పెట్టుకుని పీసీసీ అధ్యక్షుడు డి.శ్రీనివాస్‌ శ్రీకృష్ణ కమిటీకి నివేదిక ఇస్తారని ఆయన ఆశాభావం వ్యక్తంచేశారు. ఇందిరాపార్కు వద్ద తెదేపా, తెలంగాణ న్యాయవాదులకు మధ్య జరిగిన గొడవపై జేసీ స్పందిస్తూ సమావేశాలు పెట్టుకునే స్వేచ్ఛ ఎవరికైనా ఉందని అక్కడికి న్యాయవాదులు ఎందుకు వెళ్లారని ప్రశ్నించారు.