మాయావతికి నోట్ల కట్టలతో దండ

లక్నో: పార్టీ శాసనసభ్యులు బుధవారం బిఎస్పీ చీఫ్, ఉత్తరప్రదేశ్ ముఖ్యమంత్రి మాయావతికి నోట్ల కట్టల దండ సమర్పించుకున్నారు. రూ. 18 లక్షల నోట్ల మాలను వారు మాయావతి మెడలో వేసి తమ భక్తిశ్రద్ధలను చాటుకున్నారు. బిఎస్పీ ఆవిర్భావ దినోత్సవ సభలో వేయి రూపాయల నోట్ల కట్టల దండను వేయించుకున్నందుకు మాయావతిపై ఇప్పటికే విమర్శలు వెల్లువెత్తుతున్నాయి. అయినా ఆమె ఏ మాత్రం ఖాతరు చేయకుండా బుధవారం కూడా నోట్లతో కట్టిన దండను వేయించుకున్నారు.

సోమవారం పార్టీ సభలో వేయించుకున్న నోట్ల విలువ 21 లక్షల నుంచి 15 కోట్ల రూపాయల వరకు ఉంటుందని ఒక అంచనా. మాయావతి ఎక్కడికి వెళ్లిన పూలదండలు కాకుండా నోట్ల దండలు సమర్పిస్తారని ప్రజా పనుల మంత్రి నసీముద్దీన్ సిద్ధిఖి మీడియా ప్రతినిధులతో అన్నారు. మాయావతి వేయి రూపాయన నోట్ల దండను వేయించుకున్న సంఘటనపై పార్లమెంటు ఉభయ సభల్లో కూడా దుమారం చెలరేగింది. ఆ డబ్బు ఎక్కడి నుంచి వచ్చిందనే విషయంపై ఆదాయం శాఖ అధికారులు కూడా ఆరా తీయడం ప్రారంభించారు.