టిఆర్సీసిసి మూతపడిన షాపు: యాష్కీ

హైదరాబాద్: మాజీ మంత్రి జి. చిన్నారెడ్డి నేతృత్వంలోని కాంగ్రెసు తెలంగాణ ప్రాంతీయ సమన్వయ కమిటీ (టీఆర్సీసిసి)ని మూత పడిన దుకాణంగా కాంగ్రెసు పార్లమెంటు సభ్యులు మధు యాష్కీ, వివేక్ అభివర్ణించారు. టిఆర్సీసిసి ఏళ్ల తరబడి ఎలాంటి కార్యక్రమాలు నిర్వహించకుండా ఇప్పుడు సమావేశం కావడంలో అర్థం లేదని వారు బుధవారం మీడియా ప్రతినిధులతో అన్నారు. టీఅర్సీసిసిని తాము గానీ తెలంగాణ ప్రజలు గానీ విశ్వసించడం లేదని వారన్నారు. రాజకీయ నిరుద్యోగులే తమ లబ్ధి కోసం దాన్ని మళ్లీ తెర మీదికి తెచ్చారని వారు వ్యాఖ్యానించారు.

హైదరాబాద్ ఫ్రీజోన్ అంశంపై తమ పార్టీ విజయవాడ పార్లమెంటు సభ్యుడు లగడపాటి రాజగోపాల్ లక్షలు ఖర్చు పెట్టి సుప్రీంకోర్టులో పిటిషన్ వేయించారని వారు ఆరోపించారు. హైదరాబాద్ ఫ్రీజోన్ అంశంపై ప్రభుత్వం వేసిన రివ్యూ పిటిషన్ ను సుప్రీంకోర్టు తిరస్కరించిన నేపథ్యంలో వారు బుధవారం ముఖ్యమంత్రి కె. రోశయ్యను కలిశారు. హైదరాబాద్ ఫ్రీజోన్ కాదని వారన్నారు. ఈ విషయంపై అన్ని పార్టీలతో చర్చించి శాసనసభలో తీర్మానం చేసే విషయంపై నిర్ణయం తీసుకుంటామని ముఖ్యమంత్రి చెప్పినట్లు వారు తెలిపారు. రాజ్యాంగ సవరణ కోసం తీర్మానం పెడతామని ముఖ్యమంత్రి చెప్పినట్లు వారు తెలిపారు.