21న రోశయ్య సభకు లక్షన్నర మంది

నార్కట్ ‌పల్లి: తొమ్మిదో నెంబరు జాతీయ రహదారి విస్తరణ పనుల ప్రారంభం సందర్భంగా ఈనెల 21న నార్కట్‌పల్లి మండల కేంద్రంలో నిర్వహించనున్న బహిరంగసభకు సుమారు లక్షన్నర మంది ప్రజలు పాల్గొననున్నట్లు ఐటీ, క్రీడలు, కమ్యూనికేషన్ల శాఖ మంత్రి కోమటిరెడ్డి వెంకటరెడ్డి తెలిపారు. స్థానిక మునుగోడు రోడ్డులో ఏర్పాటు చేయనున్న బహిరంగ సభ ఏర్పాట్లను, హెలిపాడ్‌ స్థలాన్ని ఎంపీ గుత్తా సుఖేందర్‌రెడ్డి, కలెక్టర్‌ రిజ్వీ, ఎస్పీ రాజేష్‌కుమార్‌, స్థానిక ఎమ్మెల్యే చిరుమర్తి లింగయ్య, నల్లగొండ మున్సిపల్‌ చైర్మన్‌ పుల్లెంల వెంకటనారాయణగౌడ్‌లతో కలిసి మంత్రి పరిశీలించారు.

అనంతరం గెస్ట్‌హౌస్‌లో విలేకరులతో మంత్రి మాట్లాడుతూ తొమ్మిదో నెంబర్‌ జాతీయ రహదారి శంకుస్థాపన పనులకు గాను మొదటిసారిగా జిల్లాకు వస్తున్న ముఖ్యమంత్రి రోశయ్య బహిరంగసభకు ప్రజలు అధిక సంఖ్యలో హాజరై విజయవంతం చేయాలని కోరారు. జీఎంఆర్‌ సంస్థ ఆధ్వర్యంలో దాదాపు 40 ఎకరాల సభాస్థలంలో ఏర్పాట్లు చేసినట్లు తెలిపారు.