ఎన్ కౌంటర్ లో ఇద్దరు మావోయిస్టుల హతం

ఖమ్మం: ఖమ్మం జిల్లా వెంకటాపురం అటవీప్రాంతంలో శుక్రవారం జరిగిన ఎన్‌కౌంటర్‌లో ఇద్దరు మావోయిస్టులు మృతి చెందారు. పోలీసులకు, మావోయిస్టులకు మధ్య ఎదురు కాల్పులు కొనసాగుతున్నాయి. వేసవి వచ్చిందంటే దట్టమైన అడవులు, పచ్చని చెట్లు, పారే సెలయేళ్ల్లు కనుమరుగై సుదూర ప్రాంతాల వారికి సైతం దళాల సమాచారం స్పష్టంగా తెలిసిపోతుంది. దీనితోపాటు ఏరియల్‌ సర్వే ద్వారా మావోయిస్టుల కదలికల్ని సులభంగా పోలీసులు గుర్తించే అవకాశాలు ఉంటాయి. వేసవి కాలంలో మావోయిస్టులను సులభంగా గుర్తించే సాంకేతిక పరిజ్ఞానం అందుబాటులోకి రావడంతో పోలీసులు మావోయిస్టులను ఉక్కిరిబిక్కిరి చేస్తున్నారు.

జిల్లాలో తొలిసారిగా ఇదే కాలంలో 1991వ సంవత్సరంలో మణుగూరు మండలంలోని పగిడేరు అటవీ ప్రాంతంలో జరిగిన ఎన్‌కౌంటర్లో మావోయిస్టు ముఖ్యనేతలతో సహా 13మంది మరణించారు. అటు తర్వాత 2008 మార్చి 18న ఆంధ్రా సరిహద్దున ఉన్న ఛత్తీస్ ‌గఢ్‌లోని కంచాలలో జరిగిన ఎన్‌కౌంటర్లో ఆరుగురు దళ కమాండర్లతో సహా 18 మంది మావోయిస్టులు మృతి చెందారు. దీంతో పాటు మావోయిస్టులకు చెందిన ఆయుధాలు, పెద్ద ఎత్తున మందు గుండు సామగ్రిని పోలీసులు స్వాధీనం చేసుకున్నారు.