నిద్రిస్తున్న జాలర్లపై నుంచి ఆటో: ఇద్దరు మృతి

అనంతపురం: ఓ ఆటోవాలా నిర్వాకం వల్ల ఇద్దరు వ్యక్తులు నిద్రలోనే మృత్యు ఒడిలోకి చేరిపోయారు. అనంతపురం జిల్లా పామిడి మండలం అనుంపల్లి గ్రామం చెరువు కట్టపై మంగళవారం ఈ విషాద సంఘటన చోటు చేసుకుంది. చేపల చెరువుకు కాపలగా కట్టపై నిద్రిస్తున్న జాలర్లపై నుంచి మంగళవారం తెల్లవారు జాము ఆటో దూసుకెళ్లింది. దీంతో ఇద్దరు జాలర్లు మరణించారు. వెంకటేష్ అనే జాలరి అక్కడికక్కడే మరణించగా, మరో జాలరి ఆస్పత్రికి తరలిస్తుండగా మరణించాడు.

ఆటో ప్రమాదం ఘటనలో మరో నలుగురు గాయపడ్డారు. వీరిలో ముగ్గురి పరిస్థితి ఆందోళనకరంగా ఉంది. ఆటో డ్రైవర్ పరారీలో ఉన్నాడు. తెల్లవారుజామున చీకటి ఉండడం, ఆటోను వేగంగా తోలుతుండడంతో డ్రైవర్ కట్టపై నిద్రిస్తున్నవారిని కనిపెట్టలేకపోయారని అంటున్నారు. గాయపడినవారిని చికిత్స నిమిత్తం ఆస్పత్రికి తరలించారు.