కెసిఆర్ తొవ్వలో చిరు: న్యూస్ చానెల్

హైదరాబాద్: ప్రజారాజ్యం అధినేత చిరంజీవి తన సొంత న్యూస్ చానెల్ ను ప్రారంభించనున్నట్లు ప్రచారం జరుగుతోంది. పార్టీ సిద్ధాంతాలను, పార్టీ కార్యక్రమాలను ప్రజలకు మరింత చేరువ చేసేందుకు అదే సరైన మార్గమని చిరంజీవి భావిస్తున్నట్లు వార్తలు వస్తున్నాయి. 24 గంటల న్యూస్ చానెల్ ను ప్రారంభించే విషయంపై ఆయన పార్టీ నేతలతో విస్తృతంగా చర్చలు జరిపినట్లు తెలుస్తోంది. ఈ విషయంలో ఆయన తెలంగాణ రాష్ట్ర సమితి అధ్యక్షుడు కె. చంద్రశేఖర రావు తొవ్వ తొక్కనున్నట్లు సమాచారం. ఎలక్ట్రానిక్, ప్రింట్ మీడియాలు ప్రస్తుతం కాంగ్రెసు, తెలుగుదేశం పార్టీల వార్తలనే ఎక్కువగా ఇస్తున్నాయని, అందువల్ల తమకు ప్రత్యేకంగా టీవీ చానెల్ ఉండడం అవసరమని చిరంజీవి అనుకుంటున్నట్లు తెలుస్తోంది.

ఎబిఎన్ - ఆంధ్రజ్యోతి కార్యాలయంపై తమ పార్టీ కార్యకర్తలు దాడి చేశారనే వార్తల విషయంలో వాస్తవాలు వెలుగు చూడలేదని, తమకు సంబంధించిన వార్తలు పక్షపాత దృష్టితో వెలువడ్డాయని, వాస్తవాలను ప్రజలకు తెలియజేయడానికి తమకంటూ ఒక ప్రత్యేక ఏర్పాటు అవసరమని చిరంజీవి భావిస్తున్నట్లు చెబుతున్నారు. కేంద్రం ప్రస్తుతం కొత్తగా టీవీ చానెళ్లకు అనుమతి ఇవ్వడం లేదు. దీంతో ప్రస్తుతం ఉన్నవాటిలో దేన్నో ఒకదాన్ని కొనుగోలు చేసే ఆలోచన చేస్తున్నట్లు సమాచారం. మాటీవీ వద్ద న్యూస్ చానెల్ లైసెన్స్ ఉంది. అయితే భాగస్వామ్య చిక్కుల వల్ల దాన్ని చిరంజీవికి ఇవ్వకపోవచ్చునని అంటున్నారు.