బాబ్రీ కూల్చివేత కేసులో అద్వానీకి చుక్కెదురు

రాయబరేలీ: అయోధ్యలోని బాబ్రీ మసీదు కూల్చివేత కేసులో బిజెపి అగ్రనేత ఎల్ కె అద్వానీకి ఎదురు దెబ్బ తగిలింది. సీనియర్ ఐపియస్ మహిళా అధికారి అంజూ గుప్తా రాయబరేలీ కోర్టు ముందు శుక్రవారం అద్వానీకి వ్యతిరేకంగా సాక్ష్యం చెప్పారు. 1992 డిసెంబర్ 6వ తేదీన మసీదు ఉన్న స్థలంలోనే రామాలయం నిర్మించి తీరుతామని అద్వానీ రెచ్చగొట్టే ప్రసంగం చేశారని ఆమె కోర్టుకు తెలిపారు. ప్రస్తుతం రీసెర్చ్ అండ్ అనాలిసిస్ వింగ్ (రా)లో డిప్యుటేషన్ పై పనిచేస్తున్న ఆమె బాబ్రీ మసీదు కూల్చివేత సమయంలో అద్వానీ వ్యక్తిగత భద్రతాధికారిగా పని చేశారు.

అద్వానీతో పాటు ఇతర బిజెపి నాయకులు రామ్ కథా కుంజ్ వద్ద ఉన్నారని, కల్ రాజ్ మిశ్రా, మురళీ మనోహర్ జోషీ, ఉమా భారతి, వినయ్ కతియార్, గిరిరాజ్ కిశోర్, అశోక్ సింఘాల్, ప్రమోద్ మహాజన్ వేదిక వద్ద ఉన్నారని ఆమె చెప్పారు. అద్వానీ ప్రసంగంతో రెచ్చిపోయిన కరసేవకులు రామ్ కథా కుంజ్ కు 150 మీటర్ల దూరంలో మాత్రమే ఉన్న బాబ్రీ మసీదు వైపు డాగర్స్ తో దూసుకెళ్లారని ఆమె వివరించారు. గుంపును వినయ్ కతియార్ రెచ్చగొట్టారని కూడా ఆమె చెప్పారు. బాబ్రీ మసీదు కూల్చివేత కేసులో సిబిఐ అంజూ గుప్తాను కీలకమైన సాక్షిగా పరిగణిస్తోంది.