నివేదికలకు గడువు పెంచం: శ్రీకృష్ణ

న్యూఢిల్లీ: నివేదికల స్వీకరణకు ఈ నెల 10వ తేదీ గడువును పెంచబోమని జస్టిస్ శ్రీకృష్ణ చెప్పారు. శ్రీకృష్ణ కమిటీ సమావేశం గురువారం జరిగింది. సమావేశానంతరం కమిటీ సభ్యులు మీడియా ప్రతినిధులతో మాట్లాడారు. ఈ నెల 22, 23 తేదీల్లో తాము హైదరాబాదు వెళ్తామని శ్రీకృష్ణ చెప్పారు. 22వ తేదీన తెలుగుదేశం తెలంగాణ నాయకులను కలుస్తామని ఆయన చెప్పారు. ప్రతి ఒక్కరినీ తాము కలవడం సాధ్యం కాదని ఆయన చెప్పారు. ఇప్పటి వరకు తమకు 60 వేల నివేదికలు అందాయని ఆయన చెప్పారు.

తెలుగుదేశం తెలంగాణ నాయకులు నివేదిక సమర్పించినట్లు వికె దుగ్గల్ చెప్పారు. సిపిఐ, సిపిఎం, ప్రజారాజ్యం నివేదికలు సమర్పించాయని ఆయన చెప్పారు. మజ్లీస్ పార్టీ నుంచి ఏ విధమైన నివేదికలు అందలేదని ఆయన చెప్పారు. ప్రతి పార్టీ తమ బాధ్యతను గుర్తించి నివేదికలు సమర్పించాలని ఆయన అన్నారు.