శ్రీకృష్ణ కమిటీకి టిడిపి తెలంగాణ నివేదిక

న్యూఢిల్లీ: రాష్ట్ర పరిస్థితిపై ఏర్పడిన జస్టిస్ శ్రీకృష్ణ కమిటీకి తెలుగుదేశం తెలంగాణ ఫోరం గురువారం తన నివేదికను సమర్పించింది. తెలంగాణకు చెందిన నాయకులు శ్రీకృష్ణ కమిటీ సభ్యులను కలిసి తమ నివేదికను సమర్పించారు. నాగం జనార్దన్ రెడ్డి, దేవేందర్ గౌడ్, పోచారం శ్రీనివాస రెడ్డి తదితరులు శ్రీకృష్ణ కమిటీ సభ్యులను కలిశారు.

తెలంగాణ రాష్ట్రం ఏర్పాటు చేయాలని కోరుతూ ఎందుకు ఏర్పాటు చేయాలో వివరిస్తూ వారు నివేదికను సమర్పించారు. తెలంగాణ రాష్ట్రం ఏర్పాటు చేయాల్సిన అవసరాన్ని తాము నివేదికలో పొందు పరిచామని నాగం జనార్దన్ రెడ్డి మీడియా ప్రతినిధులతో చెప్పారు. తెలంగాణ ప్రజలు స్వయం పాలన కోరుకుంటున్నారని దేవేందర్ గౌడ్ చెప్పారు. శ్రీకృష్ణ కమిటీకి నివేదికలు సమర్పించే గడువు ఈ నెల 10వ తేదీతో ముగుస్తుంది. దీంతో రాజకీయ పార్టీల నాయకులు నివేదికలు సమర్పించేందుకు క్యూ కడుతున్నారు.