నిజామాబాద్ నుంచి డిఎస్ పోటీ?

హైదరాబాద్‌: ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్‌ నిజామాబాద్‌ ఉపఎన్నికల్లో పోటీ చేసేందుకు రంగం సిద్ధమైనట్లు తెలుస్తోంది. జిల్లా కాంగ్రెసు పార్టీ డీఎస్‌ ఎన్నికల ప్రచారానికి అధికారికంగా తెరతీసింది. 2009 ఎన్నికల్లో నిజామాబాద్‌ అసెంబ్లీ నియోజకవర్గం నుంచి పోటీచేసి ఓడిపోయిన డీఎస్‌ తెలంగాణ కోసం తెరాస, బిజెపి సభ్యులు రాజీనామా చేయడంతో వచ్చిన అవకాశంతో బరిలో దిగడానికి సిద్ధమవుతున్నారు. ఈ నేపథ్యంలో 25, 26 తేదీల్లో ఆయన జిల్లా కాంగ్రెసు కార్యకర్తల సమావేశం ఏర్పాటు చేశారు.

దివంగత ముఖ్యమంత్రి రాజశేఖర రెడ్డి మరణానంతరం ఒకటిరెండు సార్లు డీఎస్‌ నిజామాబాద్‌ వెళ్లారు. తాజాగా ఉపఎన్నికల నేపథ్యంలో 25న జిల్లాకు రానున్న డీఎస్‌కు భారీగా స్వాగతం పలికేందుకు ఏర్పాట్లు చేస్తున్నారు. తొలుత డీఎస్‌ హైదరాబాద్‌ నుంచి ఎమ్మెల్సీగా ఎన్నికవుతారని భావించారు. అనూహ్య పరిస్థితుల్లో ఎమ్మెల్సీ సమీకరణలు మారాయి. మరో వైపు రాజ్యసభకు వెళ్లేందుకు కూడా డిఎస్ ప్రయత్నాలు సాగిస్తున్నట్లు వార్తలు వస్తున్నాయి. డీఎస్‌ నిజామాబాద్‌ ఉపఎన్నికవైపే మొగ్గు చూపినట్లు ఆయన సన్నిహితవర్గాలు పేర్కొంటున్నాయి.