నాలో ప్రాంతీయతత్వం లేదు: రోశయ్య

సంగారెడ్డి: ఇటీవల తలెత్తిన కొన్ని ప్రాంతీయ సమస్యల పరిష్కారం మన పరిధిలో లేదని ముఖ్యమంత్రి కె.రోశయ్య పేర్కొన్నారు. వాటి పరిష్కారం కోసం ఇక్కడ ఘర్షణలకు దిగటం, పాలనను స్తంభింపచేయడం, విద్వేషాలు రెచ్చగొట్టుకోవడం సరికాదని ఆయన అన్నారు. సమస్యను కేంద్రం పరిశీలిస్తోందని, సోనియాగాంధీ, మన్మోహన్‌ సింగ్‌ తదితరులు చూసుకుంటారని, తనకు ప్రాంతీయతత్వం లేదని, తాను అందరికీ ప్రతినిధిని అని, కేంద్ర ప్రభుత్వం ఏ నిర్ణయం తీసుకున్నా శిరసావహిస్తానని ఆయన అన్నారు.మెదక్‌ జిల్లా జహీరాబాద్‌ మండలం అల్లీపూర్‌లో సోమవారం జరిగిన ప్రజాపథంలో ఆయన పాల్గొన్నారు. అంతకుముందు మాజీ మంత్రి ఎం.బాగారెడ్డి విగ్రహాన్ని ఆవిష్కరించి, బహిరంగ సభలో ప్రసంగించారు.

తమది పేదల ప్రభుత్వమని ఆయన చెప్పుకుంటూ తమ ప్రభుత్వం అమలు చేస్తున్న వివిధ సంక్షేమ పథకాలను వివరించారు. నిత్యావసర వస్తువుల ధరలు పెరుగుతున్నాయని, వీటిని అదుపు చేసి ఇటు రైతు నష్టపోకుండా అటు వినియోగదారుడు శక్తికి మించిన ధర చెల్లించే పరిస్థితి లేకుండా కృషి చేస్తున్నామని చెప్పారు. మెదక్‌ జిల్లాలో విశ్వవిద్యాలయాన్ని ఏర్పాటు చేసే అంశాన్ని పరిశీలిస్తామని, జిల్లా పరిధిలోని కళాశాలలను ఉస్మానియా యూనివర్సిటీ పరిధిలోనే ఉంచేలా ఒకటి, రెండు రోజుల్లో సానుకూలంగా నిర్ణయం తీసుకుంటామని ఆయన చెప్పారు. మంత్రివర్గంలో అవినీతిపరులు ఉన్నారంటూ కాంగ్రెస్‌కే చెందిన కొందరు సీనియర్‌ నేతలు చేసిన ఆరోపణలపై ఎలాంటి విచారణ ఉండదని రోశయ్య స్పష్టంచేశారు.