మహబూబాబాద్ ను చుట్టుముట్టిన తెలంగాణవాదులు

వరంగల్: వరంగల్ జిల్లా మహబూబాబాద్ ను శుక్రవారం తెలంగాణవాదులు చుట్టుముట్టారు. కాంగ్రెసు కడప పార్లమెంటు సభ్యుడు వైయస్ జగన్ ను అడ్డుకోవడానికి పెద్ద యెత్తున తెలంగాణవాదులు మహబూబాబాద్ లో మోహరించారు. మహబూబాబాద్ చుట్టూ తెలంగాణవాదులు చేరారు. దాదాపు మూడు వేల మంది ఉస్మానియా విశ్వవిద్యాలయం విద్యార్థులు మహబూబాబాద్ కు చేరుకున్నారు. తెలంగాణలోని ఇతర జిల్లాల నుంచి పెద్ద యెత్తున తెలంగాణవాదులు అక్కడికి చేరుకున్నారు. పెద్ద యెత్తిన పోలీసులు మోహరించారు. అయినా వారిని అదుపు చేయడం పోలీసులకు చాలా ఇబ్బంది ఉంది.

వరంగల్ జిల్లావ్యాప్తంగా జగన్ కు వ్యతిరేకంగా ఆందోళనలు జరుగుతున్నాయి. జగన్ గోబ్యాక్ అంటూ నినాదాలు చేస్తున్నారు. జిల్లాలోని అన్ని రోడ్లపై జగన్ కు సంబంధించిన ఫ్లెక్సీలను తెలంగాణవాదులు దహనం చేశారు. ప్టటాలపై ఆందోళనకారులు రాళ్లు పెట్టారనే సమాచారంతో రైల్వే అధికారులు అన్ని రైళ్లను ఆపేశారు. ఓ చోట రైల్వై ట్రాక్ కు ఆందోళనకారులు నిప్పు పెట్టినట్లు సమాచారం. జగన్ ప్రయాణిస్తున్న ఇంటర్ సిటీ రైలు ఉదయం పదిన్నర గంటల ప్రాంతంలో నల్లగొండ జిల్లాలోని వంగపల్లి వద్ద ఆగిపోయింది. వరంగల్ లోని నెహ్రూ చౌక్ వద్ద తెలంగాణవాదులు కాంగ్రెసు పార్టీ దిమ్మెను ధ్వంసం చేశారు.