ముఖ్యమంత్రి రోశయ్యది కత్తెర పెత్తనం: నారాయణ

రాజమండ్రి: దివంగత ముఖ్యమంత్రి వైయస్ రాజశేఖర రెడ్డి కర్రపెత్తనం చేస్తే ప్రస్తుత ముఖ్యమంత్రి కె. రోశయ్య కత్తెర పెత్తనం చేస్తున్నారని సిపిఐ రాష్ట్ర కార్యదర్శి కె. నారాయణ వ్యాఖ్యానించారు. సంక్షేమ పథకాలకు నిధుల కేటాయింపుల్లో కోత విధిస్తుండడంపై ఆయన శనివారం మీడియా ప్రతినిధుల సమావేశంలో ఆ విధంగా అన్నారు.

రాష్ట్రంలో నత్తనడకన సాగుతున్న జలయజ్ఞం, భూసేకరణపై వచ్చే నెలనుంచి రాష్ట్రవ్యాప్త ఉద్యమం చేపడుతున్నామని ఆయన అన్నారు. దీనిపై ఈనెల 23, 24, 25 తేదీల్లో హైదరాబాద్‌లో జరిగే రాష్ట్రస్థాయి సమావేశాల్లో చర్చిస్తామని అన్నారు. రాష్ట్ర ప్రభుత్వ పనితీరు ఏ మాత్రం బాగా లేదని ఆయన అన్నారు.