జార్ఖండ్ లో పది మంది మావోయిస్టుల హతం

రాంచీ: జార్ఖండ్ లో జరిగిన భారీ ఎదురుకాల్పుల్లో పది మావోయిస్టులు హతమయ్యారు. జార్ఖండ్ లోని సింఘ్ భూమ్ జిల్లాలోని బోహ్రాట్ అడవుల్లో ఈ సంఘటన జరిగింది. గ్రీన్ హక్ పేరు మీద పోలీసులు, సిఆర్పీఎఫ్, స్పెషల్ టాస్క్ ఫోర్స్ బలగాలు సంయుక్తంగా ఆపరేషన్ చేపట్టాయి. ఈ ఆపరేషన్ ద్వారా బలగాలు నక్సలైట్లకు చెందిన ఎనిమిది క్యాంపులను ధ్వంసం చేశాయి. దాదాపు 2 వేల మంది భద్రతా సిబ్బంది ఈ ఆపరేషన్ లో పాల్గొన్నారు.

ఆ ప్రాంతంలో దాదాపు 90 మంది నక్సలైట్లు ఉండి ఉంటారని పోలీసులు అనుమానిస్తున్నారు. ఇప్పటి వరకు మృతదేహాలను స్వాధీనం చేసుకోలేదని పోలీసులు చెప్పారు. క్యాంపు నుంచి 35 క్లైమోర్ మైన్స్ ను స్వాధీనం చేసుకున్నారు. మూడు హెలికాప్టర్ల ద్వారా భద్రతా బలగాలు రెక్కీ నిర్వహించి ఈ ఆపరేషన్ చేపట్టాయి. ఈ క్యాంపుల్లో పశ్చిమ బెంగాల్ లేదా ఆంధ్రకు చెందిన అగ్రనేతలు మకాం వేసి ఉంటారని అనుమానిస్తున్నారు.