కార్యకర్తలను ఉత్సాహపరచడానికే వ్యాఖ్యలు చేశా: జగ్గారెడ్డి

హైదరాబాద్‌: కార్యకర్తలను ఉత్సాహపరచడానికే తాను రెచ్చగొట్టేలా మాట్లాడానని, రెచ్చగొట్టే ప్రకటనలు చేయడం తన ఉద్దేశం కాదని కాంగ్రెసు సంగారెడ్డి శాసనసభ్యుడు తూర్పు జయప్రకాష్ రెడ్డి అలియాస్ జగ్గారెడ్డి చెప్పారు. ఈ మేరకు ఆయన రాష్ట్ర ఎన్నికల ప్రధానాధికారి ఐవి సుబ్బారావుకు వివరణ ఇచ్చారు. కార్యకర్తల్లో ధైర్యం నింపడానికే అలా మాట్లాడాల్సి వచ్చిందని ఆయన చెప్పారు. సిద్ధిపేటలో స్వేచ్ఛగా ఓటు వేయలేని పరిస్థితులను తెలంగాణ రాష్ట్ర సమితి (తెరాస) కల్పించిందని ఆయన విమర్శించారు.

కాలుకు కాలు, చేయికి చేయి తీసేస్తానని రెచ్చగొట్టేలా వ్యాఖ్యలు చేసినందుకు జగ్గారెడ్డికి ఎన్నికల కమిషన్ నోటీసు జారీ చేసింది. అంతేకాకుండా ఆయనను పోలీసులు అరెస్టు చేశారు. ఆయన బెయిల్ పై విడుదలయ్యారు. చట్టం ముందు అందరూ సమానులేనని, రెచ్చగొట్టడం తన ఉద్దేశం కాదని ఆయన సోమవారం ఇసికి వివరణ ఇచ్చారు.