వైయస్ జగన్ తో చిరంజీవి దోస్తీ: తూర్పు గోదావరి జిల్లాలో ఫ్లెక్సీలు

కాకినాడ: రాజకీయాల్లో ఎప్పుడు ఏమైనా కావచ్చునంటారు. కాంగ్రెసు కడప పార్లమెంటు సభ్యుడు వైయస్ జగన్ తో ప్రజారాజ్యం పార్టీ అధ్యక్షుడు చిరంజీవి చేతులు కలుపనున్నారా అనే ప్రశ్న తలెత్తుతోంది. తూర్పు గోదావరి జిల్లాలోని రాయవరంలో చిరంజీవి, వైయస్ జగన్ కలిసి ఉన్న ఫ్లెక్సీలను ఏర్పాటు చేశారు. ప్రజారాజ్యం గుర్తు సూర్యుడిలో వైయస్ ఫొటో ఉంచారు. వైయస్ జగన్ ఓదార్పు యాత్ర సందర్భంగా ప్రజారాజ్యం పార్టీ కార్యకర్తలు ఈ ఫ్లెక్సీలను ఏర్పాటు చేసినట్లు తెలుస్తోంది.

చిరంజీవి, జగన్ ప్రజాదరణ గల నాయకులని, వీరిద్దరు కలిస్తే రాష్ట్ర రాజకీయాల్లో పూర్తి మార్పు వస్తుందని, అందుకే ఇద్దరిని కలిపి ఫ్లెక్సీలను ఏర్పాటు చేశామని ప్రజారాజ్యం పార్టీ కార్యకర్తలు అంటున్నారు. పార్టీలకు అతీతంగా తాము జగన్ కు తాము మద్దతిస్తున్నట్లు వారు ఓ టీవీ చానెల్ ప్రతినిధితో అన్నారు. లోకసత్తా కార్యకర్తలు కూడా జగన్ కు మద్దతిస్తున్నట్లు వారు తెలిపారు.