జగన్ సోనియా గాంధీ పేరెత్తకపోవడంలోని ఆంతర్యం?

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ తన ప్రసంగాల్లో ఎక్కడా తమ పార్టీ అధ్యక్షురాలు సోనియా గాంధీ పేరెత్తడం లేదు. ఇది చాలా మందిని ఆశ్చర్యంలో ముంచెత్తుతోంది. అంతేకాకుండా, దాని వెనక జగన్ రహస్య ఎజెండా ఉందనే అనుమానాలు వ్యక్తమవుతున్నాయి. 2014లో రాహుల్ గాంధీని ప్రధానిని చేస్తామని మాత్రం రెండు మూడు సార్లు అన్నారు. అంతకు మించి ఆయన సోనియా పేరు గానీ రాహుల్ పేరు గానీ ప్రస్తావించడం లేదు. ప్రధాని డాక్టర్ మన్మోహన్ సింగ్ పేరు కూడా ఆయన ఎత్తడం లేదు. జగన్ తండ్రి దివంగత నేత వైయస్ రాజశేఖర రెడ్డి తన ప్రసంగాల్లో తప్పనిసరిగా రెండు మూడు సార్లయినా సోనియమ్మ పేరు, మన్మోహన్ సింగ్ పేరు తీసుకుని మాట్లాడేవారు. ఆ సంప్రదాయాన్ని జగన్ కావాలనే విస్మరిస్తున్నారా అనే అనుమానం కలుగుతోంది.

పావురాలగుట్టలో వైయస్ సంతాప సభలో సోనియా పేరును ప్రస్తావించకపోవడం విమర్శలకు కూడా గురైంది. వైయస్ మరణానంతరం హైదరాబాద్ వచ్చి ప్రత్యేకంగా నివాళులు అర్పించినందుకైనా జగన్ సోనియాకు, రాహుల్ కు కృతజ్ఞతలు చెప్పాల్సి ఉండిందనే అభిప్రాయం వ్యక్తమైంది. అయితే ఆ అభిప్రాయాన్ని ఆయన పట్టించుకోలేదు. ఆ తర్వాత జరిగన ఓదార్పు యాత్రల్లో జాతీయ నేతల పేరు ప్రస్తావించడం లేదు. వైయస్ ఆశయాలను సాధిస్తానని మాత్రమే చెబుతున్నారు. తద్వారా వైయస్ ను కాంగ్రెసు నుంచి వేరు చేసే ప్రయత్నం జగన్ చేస్తున్నారని అంటున్నారు. వైయస్ వారసత్వాన్ని కాంగ్రెసు వారసత్వానికి దూరంగా పెడుతున్నారు. కాంగ్రెసు పార్టీని చీల్చి కొత్త పార్టీ పెట్టాలనే ఉద్దేశం ఉన్నందు వల్లనే జగన్ కాంగ్రెసు నాయకుల పేర్లను ప్రస్తావించడం లేదనే అభిప్రాయం వ్యక్తమవుతోంది.